تـــلكَ الرائــحــة

 فتحتُ بابـي عائداً من عملي

  فوجدتُ تلك الرائحة تقتحمُ أنفي

 ناديتُ مستعجباً على زوجتي

 ماهذه الرائحة يا حَـبـيـبَــتـِي

 أجابتني بمَـيَـاصَـة أذابت قلبي

 عملالك النهاردة يا حَـبـيـبـي مَحشي



 لا أخـّــفِــي عَــلـيكم وسأخبركم بــِــسِـرّي

 فقد هيجَتْ مَيَاصَـتـُها قلبي

 وأثار صَوتـُــها عواطفي

 فهتـَفـْتُ بـأعلى صُوت فــيـَّــا

 بَــحِـــبّــك يا نـــور عِنــيــا



 إبتسَـمَتْ وأحاطت رقبتي بذراعيها

 وداعبَـتْ شـَعري بـيديـها

 وتنهَـدَتْ ثم أغمَضَتْ عَيـنـيها

 ولتسمع نبضات قلــبي

 على صدري وضَعَتْ أذنـَيّـها



 لم نشّـعُـر بالعالم من حولِــنـَا

 ولعبَ حُــــبُــنـَا العميقُ بـِــنـَا

 وظـَـــلّ شُعورُنـَـا يزدادُ ويـَكـْــبُـر

 وكـأنـــنـا في الجَــنـَّةِ وَحـــدَنـا



 لم أستطع أن أُمسِـكَ نـَـفسي

 وقلت لازم أعمل كل اللي في نِــفسي

 فأنا كالـصَــقـر

 إن أراد شيئاً ف الصباح

 لم يـنـتظر حتى يـُمْـسِـي



 همستُ لــها وفي أذني صوتُ العصافير

 حـَـــبــــيــبَـــتـي

 بــكل رقــة ودلـــع أجابـَــتني

 نعم يا حَــبـــيـــبــــــي

 أؤمـــرني وعلى أمْــــرَك أطير



 ضغطتُ على يَــدِهـَا بحنــان
 وقــلــتُ لـــها


 أطــلـقـي العـَــنـَـانَ للهَـــوى

 وأذكـُـــري ما كان قـد مَـضـَى وانـْـزَوى

 هتــلاقي بقالــنا كـتــير قاعـديـن نـتــكلم سَـــوا

 كفاية كـــده وقومي يا ولِـــيَّـة شوفــي المـحـشــي زمـــانه إسـتــوى

أحمد الدسوقي

10/05/2011

الغســيل المـنـــقـــــــوع

منذ ولادتي وأنا أعلم جيداً أن حظي ليس بالكبير
لكن اليوم كان هو يوم حظي فعلاً ,, فأثناء جلوسي لتناول وجبة الغداء
 ( الساعة 9 بالليل كده ) مسلياً نفسي بمشاهدة التلفاز,,إذ أمامي الحلقة رقم 165 والأخيرة من المسلسل الأكثر من ( فاقع ) العشق الممنوع
كل معلوماتي عن هذا المسلسل إكتسبته من تغَزّل البنات على فيس بوك في الأخ الوسيم ( مُهَـنـّد ) وكليبات الأغاني التي تم تركبيها على لقطات من هذا المسلسل
هذه هي المرة الأولى التي أصطدم فيها مع هذا المسلسل وجهاً لوجة , وياله من قدر ويالها من مصادفة
أحمدك يارب , أخيراً اتحققت أمنية من أمنياتي وهشوف حلقة من مسلسل 
( العشق الممنوع ) اللي الناس كلها بتتكلم عنه , وكمان مش أي حلقة , دي الحلقة الأخيرة اللي أكيد هي بتبقى أجمد حلقة


ويالها من حلقة .......


تبدأ الحلقة بواحد عجوز كده ( عرفت بعد كده أنه جوز البنت البطلة دي وعم أخونا وحبيبنا مُـهَـنـّـد ) قاعد يجري جرية مُـفتعلة كأنه في سباق خيل وواحدة واقفه بتتفرج على جمال جريته


وتنتقل الكاميرا إلى غرفة فيها (مُـهَـنـّـد) ومعاه بنوتة حِليوة كده ( طلع إسمها سَمَر ) وهي ماسكة مسدس وعايزه تقتل نفسها و(مُـهَـنـّـد) عامل زي المجنون وباين عليه علامات الخوف ( يا قلب أمه ) ومش عارف يعمل إيه , ( الغريب واللي لفت نظري أن أخونا مُهند كان وشه مِـبيض زيادة عن اللزوم كده,تحسوا أنه جاي من الكوافير حالاً , وطبعاً مش محتاجين أقولكوا كان بيعمل إيه هناك ( هي حاجة كده بنستخدمها في الخياطة , لأ لأ متضغطوش عليا مش هقول ),لأ ومظبط وشه تمام يعني ,أعتقد أن وش الأخت اللي كانت معاه دي مش متظبط زي ما هو مظبطـّ وشه كده) , المهم ,سيبونا من النفسنة دي ونكمل المسلسل الشيق ده, الراجل العجوز بينادي وهو جي يجري في الشارع فـ(مُـهَـنـّـد) طبعاً يسمعه ( لأن سمعه قوي ) فيجري ناحية الشباك يبص عليه وينفض لـ(سَمَر) اللي عايزه تمَوّت نفسها ونِفسها أي حد يلحقها.


الراجل العجوز ده يطلع على الأوضة لـــكن , هيهات , ( سَمَر ) طلعت بنت صايعة ومش سهلة وكانت قافلة الباب بالمفتاح , والراجل يا عيني جي جري كل المسافة دي وطالع سلالم وتعبان وقاعد يخبط على الباب , وطبعاً (سَمَر) مش فاضية تفتحله ( وراها إنتحار عايزه تنفذه ) ولا (مُـهَـنـّـد) كمان فاضي ( وراه إنتحار عايز يتفرج عليه ) , وهم الإتنين جوه الأوضه قاعدين يتكلموا , هو أنا مفهمتش ولا كلمة من اللي قالوه مع أن المسلسل مدبلج للغة العربية , مش عارف الدبلجة بقى صوتها مكنش واضح ولا أنا اللي كنت موطـّي صوت التليفزيون ولا نظري اللي ضِـعف ولا إيه بالظبط , المهم إني مسمعتش ولا كلمة , اللي فهمته إنها كانت بتقول لـ(مُـهَـنـّـد) متفتحش الباب لأنك لو فتحت الباب هتروح مني ( كأنه هيفتح باب الطيارة ويـُـنـُط مثلاً ) , المهم أن الراجل اللي على الباب بره ده زهق من كـُتر التخبيط فقرر يكسر الباب على دماغهم ودماغ اللي خلفوهم
وبضربه لولبيه , برجله القوية , الباب إتفتح زي المهلبية

  فاصل إعلاني أول


بعد - الفصلة - قصدي الفاصل رجعنا لنفس اللقطة


البنت الي معاها المسدس ( سَمَر ) حصلها نوع من الذهول و(مُـهَـنـّـد) فِـضل مِـبَـلِـم برضه ( كالعادة يعني من أول مالحلقة بدأت ) , هو تقريباً جاي النهاردة يـبـَـلِم ويرَوّح.


دا كله وأنا قاعد بتفرج مش فاهم أي حاجة في أي حاجة


قلت أسأل واستفسر من منطلق أن اللي يسأل مَيـّـتـُهش, مش هفضل قاعد كده أتفرج زي الحمــ ... إحم إحم المهم
 سألت اللي قاعدين معايا : في إيه يا جدعان ؟ حد يفهمني !!!
قالولي بقى القصة التي تقشعر لها الأبدان , ويصرخ لها الغلمان , ويفقس لها بيض السِمان , أنه في قديم الزمان , البت سمورة الأمورة , ست الحسن والجمال , قال إيه حبت الواد (مُـهَـنـّـد) الزبّــال , و(مُـهَـنـّـد) هو كمان حَبـّها , (مُـهَـنـّـد) ده بقى خاطب بنت عمّه , وعمّه ده اساساً يبقى متجوز ( سَمَر ) اللي بتحب (مُـهَـنـّـد) واللي هو كمان بيحبها , بيقولك ( سَمَر ) دي كان عندها ابن خالتها بيشتغل في ليبيا ,وهو راجع من الشغل مرة ......... ولا ده مش موضوعنا ,


المهم اكتشفت الحقيقة المُـرة .......

 أن (مُـهَـنـّـد) بيخون خطيبتة ( اللي هي بنت عمّه ) مع مرات عمّه وفي نفس الوقت مش عايز يهرب معاها ويتجوزوا علشان ميخنش عمّه ( قال يعني الواد كده لسه مخانوش ) وعلشان هو كمان بيحب خطيبته اللي هي بنت (عمّه) اللي بيخونه مع مراته وعايز يتجوزها
فيا عيني خلاص المستور اتكشف والحقيقة اتعرَفِـت و (مُـهَـنـّـد) مرضاش يهرب معاها فقررت تنتحر

عروستي


حد فاهم حاجة ؟


آدي ال 165 حلقة إتحكولي في أقل من 165 ثانية


نرجع بقى للمشهد المُرَوّع اللي وقفنا عنده


قبل المشهد حصل مشهد سريع كده البنت خطيبة (مُـهَـنـّـد) كانت لابسه فستان الفرح واتكلمت مع حد وحصلت حاجة وجريت ووقعت وحاجات كتير كده حصلت أنا ملحقتش أشوفها ( لأني كنت بآكل معلقة رُز بصراحة - منا مش هقضّـي الليلة كلها أتفرج يعني , أنا جي آكل مش جي أتفرج ) المهم إني على ما رفعت راسي كانت البنت واقفة على السلم ( بنت الجنـّـية لحقت توصل بسرعة كده ؟ )
نرجع لمشهدنا
(سَمَر) أول مالراجل دخل عليهم وحصل الموقف الشنيع ده وكله كان مصدوم ( كأنه قفشهم في وضع مُـخِـلّ ) ضغطت على الزناد وماتت.


  أن أن أن


(مُـهَـنـّـد) كالعادة فضل مُــذبَـهـِل ( معملش حاجة جديدة يعني ) والراجل العجوز واقف متحركش والبت خطيبة (مُـهَـنـّـد) وقعت على السلم وقعدت تعيط ( ليه بقى مش عارف , دي المفروض تضربلها زغروتين صوت في الهوا من الفرحة )
 وخد عندك بقى يا عم بلاي باك


بس نآخدلنا الأول  فاصل إعلاني تاني ( أيوا عارف إننا لسه واخدين فاصل من شوية, بس دي عقود يا أستاذ , القناة ماضية عقود مع شركات)


  بعد الفاصل

حوالي نص ساعة بلاي باك


تقريبا جابوا كل المشاهد اللي كانت في الحلقات اللي فاتت


قلت في عقلي الباطن طيب هي قتلت نفسها في أول الحلقة كده؟! إيه السرعة دي ؟! طب مكانت قتلت نفسها في آخر الحلقة اللي فاتت والمسلسل يخلص وخلاص
ووفرنا حلقة احنا أَوّلى بيها
قلت طيب يا ترى إيه اللي هيحصل تاني؟ ما هي خلاص ماتت !! دايماً الأبطال بيموتوا في آخر المسلسل خالص ! أول مرة أشوف حد بيموت أول الحلقة كده
بصراحة أنا مركزتش في البلاي باك لأني إنهمكت في الأكل شوية


متنسوش أني جيّ آكل مش جيّ أتفرج


الغريب فعلاً أن المشهد بتاع خطيبته وهي لابسه فستان الفرح وهي بتتكلم وجريت ووقعت وقامت ونطـّت ووصلت لحد السلم ( مشهد جديد لانج الناس أول مرة تشوفه ), دا كله حصل وأنا بضرب معلقة الرُز بس , والبلاي باك ( اللي المفروض الناس شيفاه قبل كده وحفظاه من كـُتر ما شافته في الكليبات) كان ممكن أقوم أناملي شوية وأرجع وهو لسه مخلصش .
مـُخرج عبقري بصراحة
أنا قلت أكيد بعد البلاي باك هيكتبوا النهاية ويخلص المسلسل
لكن المخرج ضِحِك عليّـا وفاجئني


طـلع لسه في باقي للحلقة


الجنازة طبعاً ومراسم الدفنة
مش لازم نحضر الدفنة بتاعت (سَمَر) ؟ دي بقالها معانا يجي 3 سنين ( بقت عِشرة يا جماعة )


كان معاها في الدفنة واحد تاني كده ميت هو كمان محدش جاب سيرته من أول الحلقة,تقريبا مات في الكواليس فقالوا فرصه واحنا بنصلي على (سَمَر) نصلي عليه هو كمان
عرفت بعد كده أنه كان شغال سواق ( مش عيب , ولا حرام ) بس الغريب أن كان في ناس بتعيط عليه اكتر من اللي بيعيطوا على (سَمَر) , أي نعم (سَمَر) كان في واحده كده عرفت أنها أمها إتشلت علشانها (أي نعم هو شلل غريب شوية بيخلي بؤك يحدف شمال أول ماتظهر في الكادر وأول مالكاميرا تبعد عنك بؤك يرجع طبيعي تاني ولما تظهر في الكادر مرة تانية متلحقش تحدف بؤك شمال تاني, فتحاول تلحق نفسك بسرعة وتعوجه بأي طريقة لدرجة انك ممكن تتلغبط وتحدفه مرة شمال ومرة يمين , بس ما علينا , هنمشيها شلل ) , بس الواد السواق ده كان فيه واحدة كده زي العسل بتعيط عليه بحرارة لدرجة إني حبيت السواق ده وزعلت عليه من غير مَعّرَفه ( أي والله ) , والموقف الغريب أن كان كل واحده جايه تعزي حاطة صورة اللي جاية تعزي فيه على صدرها , زي ( آي دي ) كده , تقريباً علشان ميتلغبطوش , دول معازيم المرحوم ودول معازيم المرحومة


إنتي تبع المرحوم ؟ هاتولها بيبسي ,, إنتي تبع المرحومة ؟ لأ انتي ليكي جاتوه , وهكذا


اللي بقى كان هيفقع مرارتي أني أكتشفت أنهم مسلمين وكاتبين آيه قرآنية على النعش
وإنا لله وإنا إليه رجعون وبيصلوا عليهم وبتاع
كل ده ومسلمين ؟
واحد خاطب بنت عمه وبيخونها مع مرات عمه وكل اللي حصل في المسلسل ده وفي الآخر يطلعوا مسلمين ؟ إشمعنى دلوقتي أظهروا أنهم مسلمين يعني؟هي دي الفكرة اللي عايزين يوصلوها للناس ؟ المسلمين عندهم الكلام ده عادي يعني ؟!!!
انا متابعتش المسلسل بس معتقدش أن طول الحلقات اللي فاتت حد فيهم جاب سيرة الإسلام أو الصلاة أو حاجة كويسة عن الإسلام
ماعلينا , إذا كان هنا بيعملوا أكتر من كده , خلوني ساكت


  فاصل إعلاني تالت ( هااا!!؟ القناة ماضية عقود , منقدرش نتكلم ) مشكلة الفواصل الإعلانية أنها (فواصل) فعلاً , بتفـْصِلك تماماً عن المسلسل ,لازم يفضل يحقنك بإعلانات لحد متنسى أنك كنت بتتفرج على حاجه أساساً وبعدين يفآجأك , هي دي بقى الفجأة اللي بيقولوا عليها


 بعد الفاصل


البنت خطيبة مهند في المستشفى ( بنت موز موز موز ) الشعر والعيون حاجة كده مينفعش تتخان
(مُـهَـنـّـد) ده طلع خروف كبير
متزعلوش مِـــنّـي بس هو خروف برضه
وأبوها بيقولها يلا قومي بالسلامة علشان نسافر وونـنـبَـسَــط
( قال فاكر يعني لما يقولها كده هتـنـُـط من على السرير وتقوله ياله بينا يا دادي )


المهم بقى ننتقل على المشهد الأقوى في تاريخ السينما البتنجانية


(مُـهَـنـّـد)  وهو قدام قبر (سَمَر)


دقنه طِـولِـت ( دليل أنه معبرهاش ولا فكر يزورها غير في الأربعين بتاعها, أكيد دقنه مطولتش في يومين يعني ) والغريب أن دقنه طِـولِـت وشعره مطولش
وشكله بقى عامل زي رَجُـل الغاب
لدرجة أني كنت حاسس أنه شوية وهيقوم يخبط على صدره ويطلع فوق الشجرة اللي وراه


الواد يا عيني كان قاعد قدام قبر (سَمَر) مُــنهار


وخد عندك عياط للصبح


الواد هاري نفسه عياط يا قلب أمه


لدرجة أن أنا نِـفسي إتسدت وبطلت أكل ( إزاي أنا آكل والسكرة ده قاعد يتشحتف كده ؟ مقدرش,تتقطع إيدي قبل متتمد على الطبق )


كان قاعد يعيط ويكلمها
مفهمتش ولا كلمة من كلامه
كان بيقطّع وهو بيتكلم
يقول كلمة ويسكت
كلمة ويسكت
تقريباً بطاريته كانت ضعيفة وملحقش يشحنها وهو جي
أي نعم هو كان بيفصل بين الكلام بالعياط
بس المهم إني مفهتش ولا كلمة من كلامه غير وهو بيقولها أنا قاتل أنا قاتل
( والإعتراف هو سيد الأدلة )


  فاصل إعلاني


  فاصل إعلاني


  فاصل إعلاني


  فاصل إعلاني


( تقريباً بيحاولوا يهَدّوا (مُـهَـنـّـد) علشان يكمل الحلقة وهو يا ضنايا مش قادر )


  فاصل إعلاني


  فاصل إعلاني


 بعد الفاصل


رجعلنا (مُـهَـنـّـد) وهو لسه بيعيط


( غالباً فقدوا الأمل أنه يهْدَى فرموه في المشهد زي ما هو كده وخلاص )


وخد عندك بقى نص ساعة كمان شحتفه وعياط على قبرها
وبعدين مسك تراب من قدام قبرها ومسح بيهم إيده كده
مش عارف كان بـيـتـيـمّـمّ ولا بيعمل إيه بالظبط
وبعدين نفـّـضّ التراب ومسح إيده في هدومه ( مش بقولكوا معفن ؟ أهو نسي نفسه وهو زعلان فظهر على حقيقته )


طبعاً أنا كنت قاعد قدام الشاشة مُـنهار من الأحداث اللي بشوفها ومتأثر جداً
ولقيت جيرانا اللي ساكنين تحتنا طالعين يشتكوا من المَـيّـة اللي بتنقط عليهم من فوق دي ( إكتشفت أن دموعي كانت بتنزل مني وغرقت الشقه وبدأت تنزل على الجيران وانا مش واخد بالي ) إنهرت ومقدرتش أكمل باقي الحلقة وطلعت جري على أوضتي أكمل عياط


بعد كده عرفت أن البنت وأبوها ( عمّ مُـهَـنـّـد وبنته ) سابوا بيتهم وخدوا بيت إيجار جديد على ناصيتين
(أصل البيت القديم كان قِــبلي ومكنش فيه هوا , لكن بيتهم الجديد بـَحري وهواه يرد الروح)
و(مُـهَـنـّـد) سافر يصور فيلم تاني ويلقـّط رزقه في مكان تاني بعد ما عمه وبنته الموزة ( اللي كانت خطيبته ) كرهوه ومبقوش طايقينه
وبس خلاص إنتهت الحلقة الأخيرة من فيلم
( المُشاهد المفقوع )
أو
(الضهر الموجوع)
أو
(الغسيل المنقوع)




في رأيي المتواضع


الحلقة الأخيرة دي كلها على بعض ( شاكب راكب كده ) متخدش أكتر من نص ساعة
ولو كل الحلقات كانت كده يبقى المسلسل كله كان ممكن يخلص في 15 حلقة
أنا عرفت كمان أنهم كانوا كل أسبوع كانوا بيجيبوا مُـلخص اللي حصل طول الأسبوع
زي النشرة كده
موجز الأنباء
أو حصاد الأسبوع
شفتوا الطعامة ؟


  اللي عايز أقوله


أنا ممكن يبقى عندي تي شيرت مش نضيف عايز أغسله


هخده أحطه في مَيّـه سُخنه وكلور أو بمعنى أدق ( هنقعه في مَـيّـه )
بعد فتره الأوساخ هتبدأ تطلع منه
شوية بشوية هيبدأ ينضف
ينضف أكتر
كل ما أسيبه فتره هينضف أكتر
لكن تخيلوا لو سِـبته أسبوعين في المَـيّـة
حاجة من إتنين
يا الـــ تي شيرت هيدُوب يا إما هيعفن
في الحالتين هيبوظ
هو كده بالظبط
المسلسل مهما بلغت حلاوته وجاذبيته لو زاد عن حدّه هيرخم ويبقى مُـمِـل
يعني إيه مسلسل 165 حلقة ؟
ليه ؟ بيعملوا إيه دا كله ؟
دا حتى المنتج هيزهق من المخرج
والمخرج هيزهق من المصورين
والمشاهدين هيزهقوا من الأبطال
والأبطال هيزهقوا من بعض
ومش هنخلص بقى
بيفكروني بمسلسل ياباني كان بيجي على القناة التانية من كام سنة مش فاكر إسمه بتاع بنت صغيرة كده كان المسلسل بإسمها
بدأ وأنا في الكلية وخلص بعد ما اتخرجت تقريباً بسنتين
قاعدين يطوّلوا في الحلقات على الفاضي
ومَـشاهد ملهاش أي لازمة والمَـشاهد اللي المفروض تبقى طويله يقصروها والعكس,
بالمنظر اللي أنا شفته في الحلقة الأخيرة ده أنا بقترح عليهم يعملوا جزء تاني من المسلسل


يجيبوا في أول حلقة
رَجُـل الغاب الأوحد(مُـهَـنـّـد) وهو نايم فوق جذع الشجرة والقرود بتتنطط حواليه وقاعد بقى يفتكر أيام زمان وذكرياته مع ( سَمَر )
ويعيدوا ال 165 حلقة تاني
والناس هتقعد تتفرج برضه
أصل إحنا أذكياء أوي
هتطلعلك واحدة تقولك هنتفرج عليه برضه , أكيد في خـُــدعة في الموضوع
ممكن متنتحرش في الآخر ؟
إزاي ياستي دا بيفتكر اللي حصل ,, يعني اللي حصل خلاص حصل
تقولك اسكت أنت , أنت مش فاهم,أكيد هيطلع في الآخر بيحلم
وتقعد تتفرج لحد آخر حلقة وتآخد على قفاها في الآخر وتكتشف أن ده مش الجزء التاني ولا حاجة ده إعادة للجزء الاول
والجزء التاني هيتعرض في رمضان الجي


طبعاً في جزء كبير نيته مش سليمة وهيتفرج على الإعادة علشان يشوف البوس تاني


إيه كمية البوس اللي في المسلسل ده !!!؟
هيجيلي واحد يقولي هو أنت شفت المسلسل كله علشان تقول البوس كتير ؟ بطلوا إفترى على خلق الله بقى وأسمع كلام عن قرف وناس ملت البلد وحاجات كده كتير


هبُـصله كده وأقوله


أنا شفت كمية أغاني معمولها كليبات على لقطات من المسلسل ده كتير جداً
وكل كليب فيه كمية بوس لو اتوزعت على 5 أفلام تكفيهم ويفضل شوية للمنتج يآخدهم معاه وهو مروح كمان
وكل كليب فيه لقطات تختلف عن الكليب التاني
يعني كله جديد في جديد , مفش حاجة بتتكرر
يعني لو المسلسل ده حوالي 130ساعة , بالميت يطلعلنا بتاع 30 ساعة بوس بيور
( مـِـشـَفِــيـيـن كده )
تحس أنهم قعدوا يبوسوا بعض يومين تلاته متواصلين وبعد كده قطعوا البوس ده حتت ( كأنها أضحية العيد ) ووزعوها على الحلقات
يعني يجوا اللوكيشن , النهاردة يا جماعة بوس
بكرة أحضان
بعده عياط
بعده أجازه علشان ترتاحوا وهنبقى نشغل للمشاهدين بلاي باك بأي حاجة قديمة قال يعني حد فيهم بيفتكر الأحداث
دول هـُــبل وبيتفرجوا على أي حاجة
شايفك ياللي هناك أنت وشايف نظرة الخبث اللي بتبصهالي, وقارئ السؤال من عنيك
بتقول دلوقتي : ولما أنت عاملي فيها محترم أوي كده قاعد تتفرج على البوس اللي في الكليبات دي ليه يا محترم ؟
بس مين قالك أني كنت بتفرج ؟
لست أنا هذا الرجل على فكرة .. أنا بس كنت بدّرس الكليب بالظبط علشان مظلمش حد ولما آجي أتكلم هنا أتكلم على يقين وتأكد
شفت بقى إنك ظالمني؟
ودا كله موضوع وموضوع الإنبهار الزيادة عن اللزوم بالأخ (مُـهَـنـّـد)


تلاقي كل واحدة قاعدة تتفرج على المسلسل وهي بتلف المحشي أو بتقطـّف الملوخية وجوزها قاعد جنبها بالملابس الداخلية  يقرأ الجرنال أو بيشدّ الواد إبنه من صرصور ودنه علشان مش عارف يحل المسألة ( في الغالب الأب ده مش بيبقى خايف على مستقبل الواد أد ماهو خايف على منظره قدام الواد , لأن الواد لو محلش المسألة دي هيتضطر هو يحلهاله , وهو أساساً مش عارف حلـّها)
المهم تلاقي الهانم قاعدة تتفرج على المسلسل وشايفه الأخ (مُـهَـنـّـد) بيبوس الأخت سمر بكل رومانسية فتبص لجوزها اللي قاعد جنبها زي وحيد القرن اللي طلع على المعاش من جنينة الحيوانات
وتقوله : شايف الرجاله بتبوس إزاي ياراجل ؟ بزمتك أنت بقالك أد إيه مابُـستنيش ؟
يرد عليها بكل رومانسية  : من أول مبدأتي تكلي بصل عـ العشا يا حبيبتي
تمَصْمَصْ شفايفها وتقوله : إخص عليك راجل , منا بغسلك سناني
يقولها : تبقى أكيد دي مش ريحة البصل بقى , إبقي فكريني أغيرلك طقم السنان أو أوديكي لدكتور يرفعه وينضفلك تحته
تقوله : أما إنك راجل قليل الذوق صحيح , بتعايرني يعني إكمني لابسة طقم سنان ؟ منتا أمك هي كمان كانت لبساه
يقولها : أمي ,الله يرحمها, لبسته قبل متموت بسنتين , مش لبساه من أيام الخطوبة ؟
وتبدأ وصلة الخناق البلدي بتاعت البيت المصري العتيق
طبعاً الواد الصغير مزقطط لأن أبوه نسي المذاكرة فيسيبهم يولعوا في بعض ويتسحّب هو على الأوضه يلعب لحد ميخلصوا خناق


كل ست دلوقتي نفسها جوزها يبقى زي مهند , تبقى الواحدة قاعدة تتفرج على المسلسل ومنيمه كرشها على حِــجرها وجوزها جنبها تقوم خبطاه بكوعها
وتقوله : شايف الرجاله يامنيل ؟
يرد عليها ببرود الرجل المصري الصميم : وشايفه النسوان يا ولِــيـة ؟


هي دي المشكلة بقى
أن كل واحدة عايزه جوزها نسخة من مهند
مع أنها مش نسخة من ( سَمَر ) ولا بلاش ( سَمَر )
البت الموزة اللي كان خاطبها دي
أنتي على أي أساس عايزه جوزك زي القمر ويهتم بنفسة وجسمة وأنتي بتهتمي بتربية كرشك أكبر ما بتهتمي بتربية ولادك؟
إزاي تقارني بين(مُـهَـنـّـد) وجوزك ومتقارنيش بينك وبين الموزة اللي معاه
تقولك ياسيدي مش لازم الشكل
أهم حاجة اللي جوة
عايزة رومانسية زي (مُـهَـنـّـد) كده
يستي دا بيمثل
تمثيل تمثـيـــــل
تقولك متمثلوا يخويا
مثلوا علينا
دنتوا أساتذة
بغض النظر عن كلمة ( دنتوا أساتذه دي ) بس أنا موافق
أمثل عليكي ساعة في اليوم ؟
ما هو (مُـهَـنـّـد) بيمثل ساعة بس كل يوم
لكن أراهنك لو مكنش متخانق مع مراته وواخدله قلمين وقعد يعيطله شوية جنب باب الحمّام قبل مينزل من البيت
مهو محدش شايف حاجة بقى
تقولك طيب ما هو بس يوريني رومانسيته هيلاقي مني أحلى رومانسية
طب متبدأي إنتي يستي
هو لو مبدأش مش هتبدأي أنتي ؟
هتفضلوا كل واحد مستني التاني يبدأ ؟
وبعدين ما هو الراجل ساكت وراضي بنصيبه المنيل وصابر عليكي ولا عمره إعترض
أنتي اللي بتعترضي وعايزه واحد زي (مُـهَـنـّـد)
لو أنتي غيرتي رأيك في جوزك وأتمنيتي أنه يتغير لمجرد أنك شفتي واحد أمور بيمثل في التليفزيون فجوزك بقى المفروض كان يطلقك من أيام الخطوبة
لما هو كل يوم بيشوف بنات زي القمر في التليفزيون وكل يوم البنات بتبقى أحلى وأنتي كل يوم شكلك بيقرب من شكل التلاجة اللي عندكوا في المطبخ ولحد دلوقتي مستحملك
لأ وساعات بيتجنن ويقولك كلام حلو كمان
شفتي التضحية ؟
إرضي يا ست هانم بقسمتك ونصيبك وحافظي على جوزك مش هتلاقي زيه تاني
ضل راجل ولا ضل شمسية
( كلام الأمهات ده )


في النهاية أنا عايز أوجه رسالة لــ (مُـهَـنـّـد)

وأقوله


متزعلش يا قمر يا عثل يا ثـُـكر أنت
ولازم تعرف أنك حد طيوب أوي ولزوز موت خالص
أنت ممكن تكون خسرت محبـّة عمك وبنته
لكنك في المقابل كسبت محبـّة ملايين البنات اللي كانوا بيتفرجوا عليك وبيتعاطفوا معاك ومع شعر حواجبك
روح يا شيخ إلهي حواجبك كلها تقع وتمشي كده من غير حواجب

ومتلاقيش حدّ يعبرك


بس خــلاص

أحمد الدسوقي

05/05/2011

زيــــكو ( حبــــيــب قلبي ) والمـُــــــدام بتــاعتــه






إضغط على الصورة للتكبيــر

 



أحمد الدسوقي

27/03/2011

أنـــا - ولا مؤاخــذة - صيدلي (1)

أنا صيدلي

مش عارف ده من حسن حظي ولا من سوءه

مش هقولكوا بقى مدخلتش الكلية دي بمزاجي ولا كان طموحي أبقى صيدلي ومش شايف نفسي في صيدلة بس أبويا اللي كان عايزني أدخلها ولا الكلام دا كله

   لا ,, مش أنا اللي أقول الكلام ده ,,,,,,

كل اللي هقوله أني مدخلتش الكلية دي بمزاجي ولا كان طموحي أبقى صيدلي ومش شايف نفسي في صيدلة بس أبويا اللي كان عايزني أدخلها

( مش قلتلكوا مش أنا اللي أقول الكلام ده ؟ )

هو أنا من صُغري وأنا مظبط نفسي أو بمعنى أصَحّ متظـَبط على أني أبقى دكتور ,, مش مهم دكتور إيه , المهم دكتور وخلاص , والدَكـتــــور أحمد راح , الدَكـتــــور أحمد جه

يتكتب في بطاقتي دكتور

طبيب بشري ,, ماشي

صيدلي ,, جميل

طبيب أسنان ,, زي الفـُــل

طبيب بيطري ,, فيها تفكير دي ( مع إحترامي الكامل للأطباء البيطرين )

المهم دخلت ثانوي وطبعا علمي علوم والحمدلله جبت 96 % في تانية ثانوي وخلاص هانت , وفاضل ع الحلو دقـّــه , وهبقى دكتور ومحدش هيقولي لأه .

وجت تالته ثانوي وأي حد بيقرأ الكلام ده وكان في ثانوية عامة دفعة 2002 هيفتكر إمتحان الفيزياء اللي جالنا والطلبة اللي كانت بتتساقط في اللجان , والصويت والعويل اللي كان بيحصل .

والعبد لله طبعاً كان من المتفوقين وحل الإمتحان كـُــله وطلع زي الأسد ,, أنا كان عندي مشكلة واحدة , إني معرفتش أن الإمتحان صعب غير لما طلعت من اللجنة ولقيت الناس بتعيط ( طبعاً من تفوقي كنت بحل الأسئلة ومش فارق معايا سهلة ولا صعبة ,, كنت متفوق جداً أصلي ).

المهم الإمتحانات خلصت والنتيجة ظهرت

وهوووووووووب

حسرة عليه يا حسرة عليه ماجاب مجموع ما جاب مجموع

مش لازم تعرفوا أنا جبت كام في الثانوية العامة ( منعاً لقتل الأمل داخل كل واحد في تالتة ثانوي وفرحان بمجموع سنة تانية اللي جايبه) , اللي مهم تعرفوه انها كانت صدمة كبيرة جدا لكل الناس اللي يعرفوني ( إلا أنا ) , أنا الوحيد اللي مكنتش مصدوم ,

مش عارف بقى هل هو برود مني ! ولا حماس زيادة من الآخرين .

يمكن علشان موضوع الدكتور ده مش فارق معايا كتير !!!؟

يمكن

المهم أن السيّد الوالد الله يكرمه برضه لسه مصمم أني أبقى دكتـــور

هو حلمه كده , أن إبـنه الكبيرة يطلع دكـتـــــور , والعبد لله هو أكبر الولاد , مش عارف برضه دا من حسن حظي ولا من سوءه .

المهم دخلت صيدلة خاصة ( جامعة 6 أكتوبـــر ) ( يلا يا جامعة دعاية ببلاش أهو )

ودخلت فعلاً صيدلة

وحبيتها جداً

يـمـكن حبيتها علشان الجامعة مش علشان الكلية

جامعة كده تـِـشرح القلب وطـَـلـَبة كده يـشرحوا القلب ( وأوعى حد يفهمني غلط ) , وقضيت فيها أحلى أيام عمري , واتخرجت منها

وبقيت صيدلي

  يا ألف نهار أبيض يا ألف نهار مبروك ,, روح يا واد وزّع الشربات خلاص فرّحت أبوك

والحياة إختلفت تماماً بعد الجواز آآآ قصدي بعد ما اتخرجت ,, صيدلة إيه وهباب إيه اللي دخلتها دي ياعم ؟ مالهم بتوع تجارة ؟؟؟؟ شغالين أحسن من مليون صيدلي ( دا مش حَسد والله, دا مجرد حِـقد بس )

إتخرجت لقيت نفسي مش عارف أفتح صيدلية ( القانون بيقول لازم بين كل صيدلية وصيدلية 100 متر ) وفعلاً الناس بتلتزم بالقوانين بالظبط , كل 100 متر هتلاقي صيدلية , البلد كلها بقت صيدليات , الصيدليات بقت أكتر من العيّـانـيـن نفسهم.

ولو لقيت مكان ينفع صيدلية إتفرج على الأرقام الخرافية اللي أصحاب المحلات دي بيطلبوها .

واحد سمسار جالي في مرة يقولي : لقيتلك مكان يا دووكتـُر (لازم يضغط على الواو مش عارف ليه ) , حلو جداً ينفع صيدلية,

الكلام ده كان أول ما إتخرجت ( بالمناسبة أنا خريج دفعة 2007 )

أروح أشوف المكان الحلو جداً ده ألاقيه في مكان مهجور جداً جداً جداً كان من 10 سنين ثـكـنـات عسكرية للجيش !! ومشفتش فيه غير كلـبــين بيجروا ورا قطة ,

قلتله : هو حـــدّ قالك إني هفتح صيدلية بطري ؟ فـين البني آدمين اللي هنا ؟ فــين الناس اللي هتشتري ؟ هـبــيع لمــــين في المـكـان ده ؟

قالي : يا دووكتـُر متستعجلش , شايف الأرض الكبـــيـــرة اللي فيها سور هناك دي ؟

( بالمناسبة السور ده اللي العساكر كانت بتتعلم فيه ضرب الرصاص أيام ماكان ثكنة عسكرية , وشكراً )

قلتله : أيوا ياسيدي ؟ ماله ؟

قالي : ركـز فيه كده .

قلتله : إيه يعني ؟ ماله ؟ هيتحول دلوقتي ويبقى الرحاب ؟

( ظهرت عليه علامات الغباء وبدأ يلعب في صلعته ) وتمتم : رحاب مين يادووكتـُر ؟

قلتله : متخدش في بالك , كمّـل .

قالي : المهم , شايف المساحة كبيرة إزاي ؟ كل ده هيبقى مباني وأبراج  ( وبيغمزلي بعينه ) . 

قلتله : دا إمتى الكلام ده إن شاء الله ؟

قالي : خلاص بيمْشوا في تصاريح أنهم يحولوها لأراضي بناء .

قلتله : يا حالولي , بيمشوا ؟ و تصاريح ؟ ويحولوها ؟ يعني بالميت كده قدامنا 10 سنين .

إبتسم إبتسامة كلها غباء وقالي : يعني , تقدر تقول كده .

طبعاً كتمت الكلمة اللي المفروض كنت أقولها قبل ما تطلع من بؤي وسكت. إكتفيت بنظرة خارقة من نظراتي التي أجيدها ( بس هو تقريباً متأثرش بيها خالص, دا إذا كان خد باله منها أساساً ).

شوية وجه صاحب المحل ده

عايز كام ياعم الحاج في الأربع جدران اللي هشتريهم منك في المكان المهجور ده؟

إن شاء الله كده مش هبيع المحل ده بأقل من 200 ألف جنيه

سلامو عليكوا

وسبتهم ومشيت

-- ** --

وللحديث بقية



 

أحمدالدسوقي

25/04/2011