الأربعاء، 27 أبريل 2011
الثلاثاء، 26 أبريل 2011
آسف يا ريّـــس
آسف يا ريّـس
آسف بــجد
شـعبـك طِــلع قاسي عليك
مش فاكرك ومش عارف حتى أنت مــيـن
شـعبك خـَـلعك ومصعبتش علـيه
مطـمرش فـيه حـُـكم السـنـيـن
لكن تخيل معايا ياريّـس
لو كـُنت حكمت بلدنا بشكل كويس
كان زمانا شايلينك على راسنا
كنا هنفديك حتى بأرواحنا
كنا هنغنيلك بنحبك يا ريّـس
تخيل معايا ياريّـس
لو رجع العمر بيك 30 سنة
كنت أيامها في عز شبابك
كان هو ده وقت عطاءك
تخيل لو كنت حكمت بالمعروف
عديت بالبلد من كل الظروف
تخيل لو كنت أعتبرت الشعب ولادك
اهتميت بيهم زي جمال وعلاءك
وفضل عدلك ساري في كــل بلادك
صدقني
كنا هنفضل نكرم فيك لحد مماتك
تخيل لو كنت حاكم عادل
الكل قدام القضاء واحد
مفيش وسايط مفيش كوسة
مفيش ناس بتتمسك من غير سبب
مفيش ناس بتموت من غير تــمن
كنت هتفضل حاكمنا وحُـكمك فينا نافـذ
تخيل لو كان هَـمّـك بلدك
تخيل لو كان هَـمّـك شعبك
تخيل لو مكنش هَـمّـك في الاول نفسك
إزاي تمحي قيمة شعبك
وعايزهم يدوك قيمة
إزاي بتصرف فلوسنا على نفسك
والناس عريانة مش لاقيه حتى هدوم قديمة
إزاي تبقى واكل فلوس البلد
وشعبك مش عارف يعيش عيشة كريمة
ياريّـس شعبك كان بيموت
وتطلع أنت تهزر بـنـكـتـك السخـيـفـة
سايب كلابك تنهش فينا وأنت ولا هامّــك
مفكرتش مره تِـحْمِـيـنا وتحِـس على دمّــك
ياريّـس الهَــمّ كان مالينا وكل منيجي نشكيلك تضحك وتقول
يــــاعــــم كـبّــــــــر مُـــخـّـــــك
بحـبــك يا ريس وبحب طيبتك
بحـبــك يا ريس بس من خيبتك
خسرت حـبـــايـبـــــك
وبالشَــرّ كله بيجيب في سيرتك
ياريّـس أنا بأي وشّ هدافع عنك
مش فاكرلك أي حاجة تخليني أحـبـك
مش فاكرلك غير نهب وسرقة وعذاب ودمار
وكل حاجة تزوّد جوايا كـُــرهـك
إيه ؟
بتقول إيه يا ريّـس؟
سامعك بتقول حاجة كده ضـربـة جـوية
إسمحلي أقولك جتك ستين خـيـبـة قـوية
هو أنت طلعت الطلعة دي لوحدك؟
ولا طلعتها بطيارتك؟
ولا حاربت أنت وعيلتك؟
في كـتـيــر غـيـرك حارب
ناس ضحت بكل حاجة وماتت
ماتت علشان غيرها يعيش
يعيش بكرامة مش مذلول من غيره
مات وهو بينصر شـعبه ويرضي ضميره
ماتوا شهداء يستاهلوا الـتـكـريـم
دفنتهم ياريّـس ودفنت معاهم التاريخ
لكن هنفضل فاكرينهم بكل خـــــــير
زي ماهنفضل فاكرين
أنك طلعت حـ.......... من غير ديــــل
متزعلش ياريّـس مش بشـتـمـك
بس تقدر تقولي فين الناس اللي كانت بتبوس جزمتك ؟
كلهم باعوك أول مضعفت جَــبّـهـتـَـك
سابوك وجريوا ومحدش فيهم طايق يبص في خـلـقـتـك
كل كلامهم عنك كان نــفـاق
الكلام اللي بـتـَمَـنْ عُـمْـر مكان ليه لزوم
كلام القلب ياريّـس هو بـس اللي بيدوم
عرفت بقى ياريّـس إني مكنتش بـشـتـمـك ؟
هو أنا برضه يا كبير عُــمري أقدر أظـلـمـك ؟
أنا آسف ياريّـس
أنا آسف ياريّـس حقيقي آسف
أني عايش بقالي 30 سنة خايف
خايف أقولك كفاية ظــلــم
خايف وعايش ماليني الجُــبْـن
أسف لأني أتأخرت في ثــورتـي
أسف لأني خدت وقت وأنا بخرج من مِـحنتي
آسف لأني سبتك تنهبني وأنا واقف عليك أتفرج
بحمد ربنا أنــك لسه سايبني عــايــش
مع أن الأعمار بإيد ربّــي وربّــــك
أنا من كل قلبي ياريّـس والله بدعـيـلك
أنك تقوم بالسلامة وربنا يـشــفـيـك
يلا يا وَحّــش سراير طـُـــرة بتـناديك
قوم بقى ياريس وشِــدّ حِــيلك
يلا يا زيــنة شباب جيـلـك
يلا يا بتاع الضربة الجوية
رجالتك كلهم في طـُــرة مِستـنِـيـنـك
في الآخر صحيح
أوعى تكون فاكرني بقولك ياريّـس علشان اللي فات
لأ يا ريّـس أنا بتكلم ع اللي جي
كلابـك هناك محتاجــيـنك
مستنينك تعمل عليهم ريّـس
ماهو زي مالشعب عايز ريّــس
أكيد الحرامي كمان محتاج ريّــس
أحمد الدسوقي
25/04/2011
قـــطر الزمن
بيعدي علـيـّــا قطر الزمن وأنا واقف مكاني
بتـْـمـُر علـيـّــا السـنـيـن وحالي هو حالي
** ** ** ** ** ** ** ** ** **
بيعدي علـيـّــا قطر الزمن وأنا واقف ببص عليه
محاولتش في يوم أجري وراه ولا حتى أنادي عليه
واقف كده أتفرج وعاجبني اللي أنا فيه
معرفتش إن هيجي يوم أنــدم إني مركبتش فيه
بيعدي علـيـّــا قطر الزمن وأنا واقف مكاني
بتـْـمُر عليا السـنـيـن وحالي هو حالي
تـتـولـد ناس
تــمـوت ناس
وأنا ليه مابتمرش أيامي
عايش تــايـه...
ضايع فالت...
أي طريق بـمّــشِـيــه وحداني
أي حوار أنا فيه الظالم
أي مصيبة أنا فيها الجاني
عايـزه تـحـبّـي ؟!
تعالي في حضني
قربي مـنــي وخـــدي حناني
عايـزه تخوني ؟!
إسرقي مشاعري
وإبــعـدي عـنـــي
سيبيني لوحدي وهِــــدّي آمـــالي
عايز صاحب؟!
قـــرّب مــني
رجُــولتي !!
مش هتلاقي زيّــها تــاني
عايز تـُـــغـّـدر ؟!
أغـّــدر بــيا
بــعّــني في ثــانــية
ولو لـُمتك قول أنــا مــالي
منتا اللي أهــبل
عايش طول عمرك ساكت
فاكر نفسك شخص مثالي
وفاكر كل الناس حواليك
عليك هتيجي تطبطب وتدادي
متعرفش أن العـالم إتــغير
كل الناس ماليها الشر
في أي شارع وأي نادي
!!!!!!!
تصدق يا صاحبي عندك حق
أنا إزاي مخدتش بالي
كل الناس قدامي بــتــسـرق
وأنا الوحيد اللي واقف راضي
كل الناس قدامي بــتــقــتـل
وأنا واقف أتفرج
لا بقتل معاهم
ولا بدافع عن المظلوم اللي بينادي
إلحقني ياللي واقف هناك تتفرج
مش شايفني ؟!
مش سامع آهاتي ؟!
أصــرخ جــامد قــول للقاضي
أنك شفتني مقتول مظلوم
أصــرخ قبل مـا يــجي علــيك الدور
وساعتها بقى مش هتلاقي
حد يـُـصرخ لــيــك وينــادي
ويجي يشهد ويقول للقاضي
أنــه شــافك مــقتول مــظــلوم
زي ماسكت على قتلي اليوم
هتلاقي اللي يـُـــسكت على قـتــلك
وقتل البـــاقي
وماتزعلش ساعتها يا حلو
ماهو أصل أنت ســـكـتْ زمـــان
وزي ماقالوا أجدادنا كمان
الــظــالــم هـو البــادئ
هتفضل لأمتى كـــده أخــرس ؟!
تسكت على ظلمك وتداري
إلـّـــحـق نــفـــسـك
فـــوق مـن وهـْـــمَــك
خــلــيـك غـُـــــول
أصـّــــرُخ قـُــــول
مـــــــن الـنـهـارده
مــحـدّش هــيُـقـف قـُـصـادي
مـــــــن الـنـهـارده
حــقـّـي هــجــيـبـه
لا يمكن تاني هــســيـبـه
مـــــــن الـنـهـارده
هــفـُـــكّ قــيـــــودي
مـفـيـش ســــلاســـل
مـفـيـش جـنـــازيــــر
مش هعـيش تـانـي فـي بـــيـــــر
هــطـلــع م الـنـــار للــنــــــور
وأعـيـش بـكـــرامـــة
ولا أجـــــــدع أمـــيــــــر
أحمد الدسوقي
08/10/2010
الخميس، 21 أبريل 2011
يــــا خـســــــارة
ياخسارة الحب اللي عَـدّى وكان
سايب ذكرى في كل مكان
يا خسارة الحب اللي عدى وراح
وساب مكانه ألم وجراح
ولا يداوي الجراح مرور الزمان
ياخسارة الحب اللي صار
ذكرى ساب مكانه في قلوبنا وطار
لمّا عدّى علينا الناس لمحوا فرحتنا
بنوا بينا ميت مليون جدار
ياخسارة حب اتولد جوانا
فضل يكبر ومن الجراح داوانا
اتشدّ ما بينا خيط رُفيع
وفجأه اتقطع الخيط
وزي متولد الحب جوانا
إتخنق جــــوانا
ياخسارة الأيام اللي فاتت ومرت
يا خسارة ذكريات زمان اللي عدت
عدت ثواني ولا حسينا بيها
ولا عمرها ترجع ولو نادينا عليها
دا الحب إن راح منك مرة
لا يمكن يرجع مهما الأيام رجعت
ياخسارة ليالي سهرناها سوا
إتنين عاشقين طايرين في الهوا
بعدِك كل الليالي ظلام
بسهر طول الليل ما بنام
عيان ودائي ملوش دوا
ياخسارة قلبك اللي ضاع من إيدي
دا يوم حبك كان يوم عيدي
حُبّ ولهفة وشوق وحنان
كله راح وبقى ذكرى زمان
هعيش على الذكرى وأقول دا نصيبي
ياخسارة كل حاجة راحت من يَــدّي
راحت خلاص والعمر بيجري
صَــبّر قلبي على البُعد يا ربـّـــي
هَونها وخلي الأيام تـعــــدّي
ياخسارة كل الأوقات اللي قضيناها
ياخسارة كل الأحاسيس اللي حسيناها
فجأة ضاعت كل حاجة
ولا كأن في لحظة حلوة عشناها
ياخسارة حُبّـك اللي ضاع من إدَيـّــــه
مش لاقي بَعدك أي حنية
بعدك كل الناس بِتقـْسى عليا
قلت لقلبي كتير ينساكي
قالي أنساها إزاي وأنا عايش بيها هــيَّ
ياخسارة رِِقـْـتـك اللي راحت مني
ياخسارة ضِحكتك اللي غابت عني
كانت منورالي حياتي
من يوم مابعدتي
والحزن مش راضي يفارقني
ياخسارة الوقت اللي بكتب فيه الكلام ده
مجرد كلام بكتبه في أجنـــدة
ولا كلمة منها هتقريــها
يمكن في يوم تحسّي بيها
لـكن يا خسارة مفيش فايدة
مــفـــيـش فـــــــايـــــدة
أحمد الدسوقي
10/12/2010
مــــــع خـالـــص حُـــــــبي
حَـــبـيـبـتي
لـيــــه القسوة عليا
طـب راحت فين الحنية
زرعتي حـُبـّــك فـي قلـبي
ولـمـا كـِـبر دبـحـتـيه فيّــا
أيــوا حـُـبّـك إتـــزرع جــوايـا
وكل يوم بـيـكّـبَر ويـعـلـى فـي سمايـا
وجذوره إتـْمَــدّت لـسابـع أرض
وفــروعـه بـقـت رمـــز الحرية
دا إنـتـي هــوايـا والمـيّـة
ونـبـع الـدفــا والـحِـنـّـية
بتلوميني على غيرتي عليكي
أيــوا بـغِــيـر وهـفـضـل أغِــير
الإنسان مايغرش إلا ع اللـي يـحـبّـه
وأنـا مـش بَــحِــــبّــك وبـس
دا إنــتــي كُــلّ شــئ ليّــا
حُــبّي ليـكي دا شـئ مش عـادي
مـقـدرش فـي يـوم أعـتـبـره مـاضي
كـنـتـي مـعـايـا فـي كـل حـلـوة
كـنـتـي سَــنـَـدي فـي كـل مُــرّة
الإنسان بيقابــل نـاس كـتــير
بس حبيبة مبيقابلوش غـير مَــــرّة
بـتـلـومـيـني على خـوفي علـيـكي
طـب قوليلي إزاي مَـخَـفـْـش على روحي
أصل انتي روحي وروحي معاكي
لو تروحي تروح مني روحي
دا أنا روحي تروح مني
ولا لحظة تغيبي عني
عارف ساعات بخنـقـك
بغِـيرتي وخـوفي عليكي
لكن لو تشوفي الحقيقة
هتـعرفي أنّ السـبب حُــبّي ليــكي
وشُـوق مالـيـنـي ولهـفة عليـكي
بنات كتير هيموتوا عليــا
وأنـا ولا فـارق معـايــا
مش عايـز غيـرك ليَّــا
ولا فـي غــيرك جوايـّــا
كـل يوم إحساسي بـيـكبَر
إنـّي مش عايز غيرك ليّــا
ومع ذلك بتـقـسـي عليـَّـا
كل يوم بتزيد قساوتك
وأنا صــابـر وراضـــي
بَصَــبّر نفـســي بطـعـم غـلاوتـِك
وســاكتْ وعـــــادي
لـكـــنـّي بـشــــر
وكـل بشر جواه مشاعر
خايف مشاعري في يوم تـــموت
ماهي كُـتر القسوة تِـفلق الحجر
وتـزلـّـزلّ الأرض وتـهدّ الجـبل
يبقى مش هتمَوّت مشاعر بشر!!؟
حاولت أكرهك بس مش قادر
منا أصل قلبي مش بإيدي
لو بإيدي كنت أحطـّ بينك وبيني سـاتر
وأروح لغـيـرك وتشــوفي وعيـــدي
ماهو أنتي اللي بدأتي القساوة
وبــدلــتـي الـحُــــــبّ بـعــــداوة
من النـهـارده هقـسِّـــي قـلــبي عليـكي
ولو هـمـــوت عُـمـري في يوم ما أناديــكي
اعتبريني طير رَسَــى على نـبـعـك
لما شِــرب شـــرّبته سابـك وطــار
مـاطــارش لأنـه شِـــــبـع
طــار لأنـه داق جـواكي مَـــرَار
على إيه بتقـْسِــي علـيّـا !!؟
دنا طول عمري واقف جنبك
كان عندي استعداد أفديكي بعمـري
اســـألـي حـتــى قلـبـــــك
إديــتـكْ حُــــبّ وحَـنـَــان
إديــتــكْ شـــوق وأمـــان
وحاجات كـتــــيـــــر يامـا
محدش خدها قبلك
ولا هديــــها لـحـــد بِـعــــدِك
مـنـا بـعــدك مبقاش فيّـا قـلــب
مش هـحِـبّ تاني ولا هتـْحَــبّ
قـلـــبـي خـــلاص مبقـاش يـحسّ
زي ماعلــمـتـيه الحِـنـّـية
علمتيه ازاي يبقى صَـــلّـب
ويعرف يـقـسى ومـيـهـمـوش حــدّ
ويــظــلـم ويـغــلـط ويجــرح
وميـسـتـنـاش ردّ
بـحِــــــبّـك ؟! , آه
كـتـيــــــر ؟ دا أكـيـد
مش محتاجه ســؤال ولا تـأكـيـد
لكن عُـــمْــر الـحُـــبّ ما كان ضَـعـف
وذُل ومـهــانـة ونـَـدَم وغـــمّ
الحُـــبّ طـــول عُــمْـره قــوة
بــيـقـَـــوي الراجـل وقــت الشِــدّة
مش بيضْـــعِــفه قـُــدام حَـبـيـبُه
يــــذلـه ويــهــيــنه
وعلشان بيحبه ,, يسكت ويــســيـبه
يــذلـه ويـهـيـنـُه أكـتـــر وأكـتــــر
ومـن كُــتـْـر حُـــبّه مـيردش ويُـصّــبُر
الحُـــبّ دا خـوف ع الحَــبـيـب
أكتر من النـفـس ومـن أي قــــريب
هو أنا اللي هعلمك الحب ولا إيه ؟
مش أنتي اللي علمتهولي زمان؟
جه اليوم اللي التلميذ يعلم أستاذه
واللي علمتهولي أرجعهولك زي ماكان
الحُـــبّ دا قــوة وكـرامة
مش علـشـان بَحِــبّــك
تخلي كرامتي متـهـانـه
الحُـــبّ مـش كــلام وبَـسّ
الحُـــبّ طــول عـمــره شئ يـتـحـس
وأنا مبقتش بـحـس مـنـك حُــبّ
كـلـه نـكـد وغــم وكُـــره
إستـحـمـلـتـك كـتـيـر وكـتـيـر
وخلاص طفح الكــيل وإتـمـلى الـبـيـر
ومش هســكــتلك تاني ابداً
وهعرفك أن صوت الأسد اسمه زئيــــــــر
مش هصبر تاني على هَـوان
طَلـَّعي كل اللي جواكي
خلي المستخبي يــبان
منا عرفت خلاص قيمتي عَـندك
قولي اللي تقوليه وزَودي في عِـندك
مـبـقـتـيـش تـفـرقـي مـعايــا
الغلطة غـلـطـتـك والذنـــب ذنـبــك
مستنيه مني إيــه بـعــد القـسـوة دي ؟
إنـــي أجــيلك راكع أتـــوسـل ؟
حسبتيها غلــطـ الـمَـــرّه دي
مش أنا الراجل اللي سِــت تـخليه يـتـذلـلّ
هبــعد وهسـيـبـك لحـيـاتـِك
شوفي غـيـري اقـسـي وعـذبـي فـيـه
أنـا خـلاص فــاض بـيـّـا
ومـبـقـاش عندي شئ أبــكي علـيــه
يــلا خلاص إبــعـدي عـنـّـي
سـيـبـيـنـي أشـوف حيــاتـي بعيــد عنـّــك
وأشــوف مـيـن عايـز يـقـرب مـنـّـي
حـدّ يـكون حنين بـطـبـّـعه
أصل الحنية لو مش طبع في الإنسان
مهما حاول يــمَـثـّـل
هيجي يوم والتمثيل يتكشف ويـبـان
روحي وسيبي قلبي أشلاء
وأنا بنفسي هدَاوي جرحي
منا خلاص عرفت الـــداء
وبقولك سلام من كل قلبي
وربنا يسعدك بغيري
مع خـــالـص حُــــــــــــــــبـي
أحمد الدسوقي
21/08/2010
الاثنين، 18 أبريل 2011
حــــاولت أنســــاك
حاولت أنساك ومقدرتش
نسيت الناس ولا نسيتك
ولا نسيت أني حبيتك
حاولت أنساك ومقدرتش
وبعترف أني هويتك
حاولت أنساك
حاولت أبعد لقيت نفسي
نسيت روحي وكمان إسمي
دنا ممكن أبيع الناس
علشانك وأبيع نفسي
نسيت الكون ولا قدرت أنساك
حاولت أنساك نسيت نفسي
دنا نفسي بتتمناك
حاولت أنساك نسيت العالم
دنا والله ما بدي سواك
حاولت أبعد بعيد عنك
لقيت روحي كمان عشقاك
إزاي أشيلك من قلبي
وعيني على طول شيفاك
ولما لقيتني مقدرتش
جتلك أوام مفكرتش
جتلك حاطط عمري فداك
أفديك بعمري يا عمري
وأدوس في النار لأجل رضاك
ولو تطلب كمان روحي
ما تغلى عليكي يا روحي
دنا عمري وكمان روحي
ما يســوُا لحظة في حضن هواك
راجعلك تاني مش همشي
ولا هحاول تاني أنساك
حياتي بدونك ماتسوى
حياتي بدونك
سراب
** ** ** **
بعيد عنك يا روحي
زادت جراحي وجروحي
راجعلك تاني أداويها
ومن غيرك بموت فيها
دنا ضحكة شفايفك
بكل حياتي أفديها
راجع وبقولها بصوت عالي
مش هبعد أبداً تاني
ومهما قابلت من تاني
ولو قمر النجوم جاني
لا يمكن أنا أبداً أرضى
بغير حبيبي الأولاني
أحمد الدسوقي
15/10/2010
الاشتراك في:
الرسائل (Atom)