صحيت الصبح بدري
يدوب غسلت وشـّـي
ولبست تي شيرت الأهلي
وبسرعة ودّعتْ أهلـي
وبوست إيـد أمـي
نازل فرحان كـُـلي حماس
بجمع أصحابي وكل الناس
خطفنا حماسنا عـ النادي
نـودّع اللعيبة وبإسمهم ننادي
ركبنا أتوبيساتنا وحماسنا بيزيد
قعدنا نغني
الشعب يريد
والأهلي حديد
وبيـــنـَـا على بورسعيد
نجيب فوز جديد
هيبقى يوم سعيد
على كل الأهلاوية
إن شاء الله أكيــد
ولازم أقعد في أول صف
علشان أعرف أشجع
وأكون من اللعيبة قـرِيب
وصلنا وبدأ الماتش
كالعادة بنشجـع
وبنصرخ وبنهتف
ولأعلام الأهلي بنرفع
هوب الجول الأول
الله حيّ التاني جيّ
يلا يا أهلي هات التاني
وهنغنيلك كل الأغاني
حسّـينا بحاجة غريبة
في تصرفات مُريبة
جماهير بتـنـزل الملعب
واللعيبة لسه بتلعب
رميـنا كل شكوكنا
وقعدنا نشجع فريقنا
فريقنا كان خسران لكن بنشجعه
بس في تـوَتـُـر
أنا حاسُـه وبسمعه
فجأة الماتش خِـلِص
ومعرفتش إيه حصل
ناس بتجري
وناس بتهرب
وحاجات جنبي بتتكِـسِـر
جريت معاهم معرفش ليه
مش جبن مني
لكن حسيت بالخطر
مش ضعف مني
ومش ههرب مـ القدر
وأنا بجري لقيت واحد غرقان في دمه
وقفت وبسأله مالك ؟!!
لقيتني مرمي جنـبـه
ضرب في كل حِــته
معرفش بيجيلي منين
مش عارف أقول آآآه
ولا أنادي وأقول مين
فجأة الألم راح
مبقتش حاسس بيه
والدنيا بقت بيضااا
حواليا في كل مكان
قلت يااااه يارب
لما بترحم الإنسان
من بطش الإنسان
مكنش عارف أنا فين
لقيتني بطلع من جسمي
وببص عليا من فوق
والناس بتشيلني
وناس قاعدة تقولي فوووق
لحد ما شفتهم بيغطوا وشـي بغطا أبيض
ساعتها بس عرفت
وعمري ما اتصورت
أني لما صحيت الصبح
لبست التي شيرت الأحمر
وسبت بيتي وأهلي
ورُحت أشجع الأهلي
وجريت على بورسعيد
اني هرجع في كفني شهيد
أحمد الدسوقي
01/02/2012
