أنا - ولا مؤاخــذة - صيــــدلي (2)

=-=-=-=-=-=-=-=-=-=-=-=-=-=-=-=-=-=-=-=-=-

لو مكنتش قريت الجزء الأول أنصحك متقراهوش

http://dosdos7.blogspot.com/2011/05/1.html

=-=-=-=-=-=-=-=-=-=-=-=-=-=-=-=-=-=-=-=-=-

أنا صيدلي

مش عارف ده من حسن حظي ولا من سوءه

=-=-=-=-=-=-=-=-=-=-=-=-=-=-=-=-=-=-=-=-=-

تختلف نظرة الإنسان العادي إلى الكائن الغير عادي ( اللي هو الصيدلي ) وإلى الصيدلية اللي هو قاعد فيها من شخص إلى آخر

في وجهة نظر بتقول : أن الصيدلي ده كائن ملوش لازمة دخل كلية ملهاش 30 لازمة برضه وأنه ولا مؤاخذة واقف ف الصيدلية زيه زي أي كرسي

ملوش أي رأي

كل وظيفته أنه يصرف الروشتة ومش من حقه يغير أو يقول أي كومنت على الدوا اللي مكتوب حتى لو كان كل دوا متعارض مع الدوا التاني

أنت مجرد(بقال) تجيب اللي يتقالك عليه وبس.والصيدلية دي مجرد سوبر ماركت ، زي ما بتبيع دوا ، بتبيع أي حاجة تانية لدرجة أنه ممكن يستغرب لو سألك على مسحوق غسيل وقلتله مفيش.

 وفي وجهة نظر أخرى بتقول : أن الصيدلي ده عبارة عن أطلس طبّي ماشي على الأرض،قاموس ( اسم النبي حارسه وصاينه ) حافظ كل الأدوية اللي نزلت واللي لسه منزلتش ، الذي كان منها والذي لم يكن ،، يكون عارف كل الأمراض وتشخيصها وأسباب حدوثها ومضاعفاتها وطرق الوقاية منها والعلاج بالإضافة إلى إجادته الكاملة للطهي والمسح وتربية الأطفال ؛ من الآخر كده الصيدلي ده بتاع كله.

النوع ده لو سألك عن أي حاجة أياً كانت بقى حتى لو مش تخصصك ، مش هقولك وطلعت مش عارفها ، لأ ، طلعت مش عارف كل حاجة عنها ،، هيفقد الثقة فيك ،هتبقى من وجهة نظره ولا مؤاخذة(حُمار) وعمره ما هيسألك على حاجة تاني ويمكن متشفش وشه تاني كمان.

وطبعاً لازم تسمع منه "أومال صيدلي إيه وبتاع إيه ؟! "

ميعرفش أن في كل يوم أكتر من 5 أدوية جداد بينزلوا السوق؛يعني الواحد لو قعد شهر مينزلش الصيدلية هيرجع يلاقي عدد الأدوية الجديدة أكتر من الأدوية القديمة نفسها.

مهنة الصيدلة

أو مجال الأدوية بصفة عامة فيه ميزة قوية جداً وعيب أقوى بكتـــــير

الميزة هي أن المجال ده واسه جداً وممكن يتسع لجميع المؤهلات

أما العيب

فهو أن فعلاً كل المؤهلات بقت بتشتغل فيه

ابتداءًا باللي معاه الابتدائية ( ويدوب بيقرأ حروف الانجليزي بالعافية ) لحد الأطباء البشرين اللي بقوا بيشتغلوا في مجال الدعاية وبيفتحوا صيدليات وشوية وهيطلعوا كارنيهات نقابة الصيدلة.

موقف حصل معايا شخصياً

وأنا واقف في صيدلية دخل عليا راجل كبير قالي:أنت صيدلي؟ قلتله :آه ، قالي: طيب

ممكن تقرالي الروشتة دي لو سمحت؟

قرتهاله ، وقلتله : أجيبلك الأدوية اللي فيها؟ قالي : لأ ؛ أنا عندي صيدلية وراكوا

!!!!!!!!!

طب إيه يا عمّنا ؟!!!
حكالي بقى قصته
أصل أنا عندي بنت خلصت كلية تجارة وقاعدة في البيت زهقانة فقلت أفتحلها

صيدلية تسلي نفسها بيها (على حد كلامه) وفي واحد دخلهم بالروشتة دي فمعرفوش

يقروها فقال يجي يستعين بينا.

مكنش الفيس بوك أيامها  بدأ بالانتشار الواسع ده فالبنت ياعين أمها كانت قاعدة في البيت والملل هيقتلها ، فالأب الحنون معجبوش الوضع وخاف البنت تقطع شرايينها من الملل ولا حاجة ففتحلها صيدلية تضيع وقتها فيها.

(هو أنا لو قلت كلمة وحشة دلوقتي هتقولوا عليا قليل الأدب ؟)
 كل واحد حر في إختيار مهنته وعمله وكل واحد ليه رزقه

لكن في حاجة اسمها التخصص

التخصص اللي بيخليني أقول لزبون داخلي يستشيرني في حاجة بيشتكي منها أنا معنديش معلومات كفاية عنها ومش هقدر أفتي فيها : لازم تروح لدكتور.

مع العلم أن الدكتور مفهّم المريض ومفهّم نفسه ومفهّم الناس كلها أنه أعلم واحد بالأدوية ( وهو في الحقيقة بيآخد معلوماته عن الأدوية من مناديب شركات الأدوية ، وكله على ادينا بعون الله ).

التخصص يا سادة ، التخصص

التخصص اللي ميخليش أي حد يشتغل في أي حاجة

وإيــه النتيجة؟
النتيجة أن القانون بيقول أن لازم يكون بين كل صيدلية والصيدلية اللي جنبها 100 متر ،، وبالفعل ، القانون بيطّبق بالظبط (وبتلاقي كل 100 متر صيدلية ) ، الصيدليات بقت أكتر من المرضى نفسهم ، غير الصيادلة بقى عندهم صيدليات أكتر من الصيادلة ، أنا أعرف صيادلة مش لاقين مكان يفتحوا فيه صيدلية ( وعندهم القدرات اللي تخليهم يقدروا يفتحوها بمجرد أنهم يلاقوا مكان مناسب ) ، وأعرف في نفس الوقت ناس مش صيادلة عندهم سلسلة صيدليات.
بس اللوم برضه بيقع على الصيادلة اللي بيبيعوا اسمهم لأي حد علشان يفتح صيدلية لمجرد أنه يآخد كام مليم كل أول شهر منه.

=-=-=-=-=-=-=-=-=-=-=-=-=-

الصيدلي ده كائن اسفنجي غلبان

أول ما تشوفه تحس انه منفوخ كده وحجمه كبير ، ولو ضغط عليه هتلاقيه طري وضعيف ومكسور الجناح،

يفضل 5 سنين في الكلية يفحت في نفسه ويشمّ في أحماض ويشرب في كيماويات لما تطلع عينه وأول ما يتخرج بيبقى راسم لنفسه حياة حافلة بالصيدليات والزباين والأدوية والفلوس اللي بتجيله من كل ناحية،

تلاقي أهله : شايفينه خارج وداخل عليهم وهم متوقعين أن ابنهم ده البرستيج والـشياكة والأناقة كلها ومتصورين أن الواد بيمشي في الشارع الناس كلها بتعامله كأنه مَلِك وسُلطان زمانه ( والزمان اللي بعد زمانه ).

وتلاقي أصحابة : شايفينه الواد اللي قاعد في الصيدلية مش بيعمل حاجة طول اليوم غير أنه يبيع أدوية ويتفرج على ماتشات ويلعب بلاي ستيشن وآخر اليوم يقعد يعدّ في الفلوس.

أو لو شغال في الدعاية بقى ،، اوعى وشك يابن المحظوظة ،، قاعد في بيتك طول الشهر وآخر الشهر تروح تسحب الكام ألف جنيه بالفيزا من البنك وآخر كل سنة تسافرلك سفرية حلوة ، دا غير الفنادق بقى والمؤتمرات والعيشة المرتاحة يا معلّم ، وكله على حساب صاحب المَخِــل ( الشركة ).

وتلاقي حبيبته : شيفاه السوبر هيرو بتاعها اللي كل ما تتعب أو حد من أهلها أو صاحباتها يتعب ( حتى لو جاله داء السلطعون ) تجري على حبيب القلب تسأله أديله دوا إيه؟ وتفضل تتفشخر بيه وبجمال شكله وهو لابس البالطو الأبيض
( اللي هو أصلاً مبيلبسوش ).

وتلاقي الزباين : شايفينه حرامي كبير بيسرق فلوسهم وبيبذل أقصى جهده علشان يموتهم ويبوظ كل اللي الدكتور بيعمله ، ولولا أنهم مفتحين وصاحين والدكتور ( الله يكرمه ) بيحذرهم من ألاعيبه كان زمان الصيدلي ده ادّاهم أدوية بديلة تجيب أجلهم بمجرد أنهم يدفعوا الفلوس ويخرجوا من الصيدلة ، قبل حتى ما يلمسوا علبة الدوا.

وتلاقي الحكومة : شيفاهم جراد بينتشر بسرعة كبيرة فلازم يحاولوا يرشوا عليهم مبيدات علشان يقللوا الإنتشار الرهيب ده.

مش بقولكوا كائن اسفنجي غلبان !!

** وللحديث بقية **

أحمد الدسوقي

21/8/2012