حُبِّكْ إيه بالنسبة ليا
حُبّ جنون أو أنانية
حُبّ يخلى الحجر يتكلم
حُبّ يقول خليكي ليا
حُبِّكْ إيه بالنسبة ليا
حُبّ خلانى أطير لبعيد
فوق فى السما ,أطير مسافات
أطير وأرفرف من غير جناحات
أطير وأغني وأقول مواويل
أقول يا مين يرجع العُمْر اللي فات
حُبِّكْ إيه بالنسبة ليا
لو بإيدي أرّجَع بعمري
أتمنى أعيشه بس ليكي
ويبقى همي كله سعادتك
وأحط حياتي بين اديكي
حُبِّكْ إيه بالنسبة ليا
حُبّ خدنى لفوق لبعيد
فوق الأرض وفوق السما
حُبّ خدني من غير مواعيد
حُبِّي ليكي دي أكبر ملحمة
حُبِّكْ إيه بالنسبة ليا
حُبّ خدنى من بين العالم
خلاني أدوب فى عالم تانى
عالم مليان حب وأحاسيس
أهو دا العالَم اللي مش فاني
حُبِّكْ إيه بالنسبة ليا
حُبّ عدى كل الحدود
حدود المسموح واللا مسموح
عدى حدود الدنيا وطار
وعايش لوحده في عالَم مفتوح
حُبِّكْ إيه بالنسبة ليا
حُبّ سحرني
حُبّ أسرني
حُبّ خلاني
أصحى من النوم
أقوم وأغني,وأقول آه ياني
حُبِّكْ إيه بالنسبة ليا
بتحسسيني بحُبِّكْ ليا ؟!
وشوق ماليكي ولهفه عليا ؟!
كل دي احاسيس غالية
لكن لو بصيتي جوايا
هتلاقي مشاعر غير متناهية
حُبِّكْ إيه بالنسبة ليا
نفسي أجري عليكي وأحضنك
بعيوني وبين خفوني أسترك
من القمر خايف يلمحك
يغير منك ويحسدك
حُبِّكْ إيه بالنسبة ليا
لمسة إيدك مليانه حنان
لو إتوزع ع الدنيا كفاها
لكن حنانك دا ليا لوحدي
وباقي الدنيا ؟؟!
اللي خلقها يتولاها
حُبِّكْ إيه بالنسبة ليا
السؤال ده موجه ليكي
إنتي متعرفيش إني عايش بيكي؟
وإن حياتي ملك إديكي؟
وميفرقش معايا العالم
مش عايز غيرك حوليا
ولاغير إني أكون حوليكي
حُبِّكْ إيه بالنسبة ليا
عايش طول عمرى لوحدي
وفاكر إن سعادتي فى بعدي
عن كل الناس من حوليا
حُبّكْ خلاني أفوق من وهمي
حُبِّكْ إيه بالنسبة ليا
حُبّكْ غيرني وخلاني
إزاي أقدر أرجع فى ثواني
أعيش وأحب كل الناس
حُبّكْ رجعني إنسان من تاني
حُبِّكْ إيه بالنسبة ليا
خلى حياتي ملهاش قيمة
جنب ضحكتك الرقيقة
تضحكي يضحك الكون معاكي
تحزني تلاقي الدنيا حزينة
حُبِّكْ إيه بالنسبة ليا
عايش قبلك على ماضي
مأثر فيا ومخلي حياتي كئيبة
حُبّكْ خلى لحياتي معنى
حُبّكْ مسح حياتي القديمة
حُبِّكْ إيه بالنسبة ليا
دخلتي حياتي ونورتيها
ماهي قبلك كانت عتمة
بدخولك ووجودك فيها
حولتيها لأجمل نجمة
حُبِّكْ إيه بالنسبة ليا
حاجه كده من غير إسم
تقدر تدخل جوا الجسم
تفضل تكبر وتعيش جواك
هتعيش طاير ودايب فى هواك
لكن لو تخرج منك
هتلاقي نفسك مجرد إسم
حُبِّكْ إيه بالنسبة ليا
أقول إيه بس في حُبّكْ!
دا كل الاماني بقت قربك
وهاجس فراقك لو جه على بالي
دنا ممكن أموت من فكرة بُعدك
حُبِّكْ إيه بالنسبة ليا
أقول تاني ولا كفايه ؟
صعب أوصفلِك كل اللي جوايا
لكن حاولت بس أوضحلك
حُبِّكْ دا يبقى إيه بالنسبة ليا
أحمد الدسوقي
30/4/2010
30/4/2010
7elw 2weeee ya ahmed 2stamer rabena yewafa2k ya rab : )
ردحذفbgd msh 3rfa a2olk eh ya ahmed kalamk 7lw aweeeeeee w dah msh gdid 3lik kol mara btstbtli enak e7sasak mo5tlf rabna ywf2k dyman isa w mstnya el gdid w el2gmal isa ;)) <3
ردحذفWeeeeeeeeeeeeeeeeew
ردحذفأزال أحد مشرفي المدونة هذا التعليق.
ردحذف