مـــــــــــن أنــــــــتم !؟

شاهدتُ منذ قليل الفيديو الذي إنتشر في الآونة الأخيرة والذي تسبب في كثير من الجدل والشــك والحيرة والريبة ولا سيما الذهول عند كثير من الناس وأنا أولهم ,,ألا وهو الفيديو الذي ينقل حديث الشيخ محمد حسين يعقوب وكلامه عن الإستفتاء العام الخاص بالتعديلات الدستورية وعن -غزوة الصناديق - على حد تعبيرة
وتابعت الكثير من الأحاديث والأقاويل حول هذا الكلام وحول تلك الآراء.

في البداية أحــب أن أذكر أنني من أشد المُعــجبين بالسلفين لكل قاعدة شواذ ولا توجد جماعة أو إتجاه أو حزب يخلو من بعض الفئات التي تحمل أفكار شاذه وغريبة , لكني بصفة عامة أحترم السلفين جداً , وكم تمنيت أكثر من مرة أن أكون منهم,أقصد أن أكون ذلك الشخص الذي يهتم بدينة أكثر وأن يحاول البُــعد عن المُحرمات قدر المستطاع

أعلم أن تلك الصفات ليست في السلفين وحسب لكني أرى أنهم يهيئون المناخ المناسب لذلك ( وهذا رأيي الشخصي ) إتفق معي

أو إختلف

ولا أقصد بكوني تمنيت أن أكون مثلهم أنني تمنيت أن أعتنق الإسلام , فكلنا سلف وكلنا من أهل السنة والجماعة

محلوظة عابرة : هيطلعلي واحد دلوقتي يقولي طيب يا خويا لما أنت عايز تبقى منهم ماتروح تبقى منهم , حد ماسكك ؟

 إجابتي هي : أن هذا ليس وقت مناقشة في هذا الموضوع ولكني فكرت فعلاً منذ حوالي 5 سنوات أن أنضم إليهم ولعل الذي منعني هو أمن الدولة وقتها ,وكما قلت ليس هذا موضوعنا

الموضوع الرئيسي هو تلك الحالة من الذهول والإستغراب والإستنكار التي إنتابتني وإنتابت الكثير بعد سماعي لكلام الشيخ محمد حسين يعقوب , وبعد كل تلك المواقف المتكررة والكلام الكثير من ( السلفين ) بعد نتيجة الإستفتاء وعن انتصار الإسلام على أعداءه

وبإعتباري واحد من أعداء الإسلام ( لأني قلت لا للتعديلات الدستورية ) فعايز أعرف هل أنا فعل آثم لأني قلت لأ ؟! هل أنا فعلاً لم أنصر ديني لما قلت لأ ؟! طيب على أي أساس ؟ وبأي حق الناس اللي بتقول أني آثم قالت كده ؟! أمال فين الديموقراطية اللي بتقولوا عليها واللي الناس ماتت علشانها؟! هي الديموقراطية أني أطلب رأيك , أختار نعم أو لأ ,, بس خلي بالك , لو قلت نعم فجزاك الله خيراً , لكن لو قلت لأ فأنت رجسٌ من عمل الشيطان !!! طيب ما أنت كده مخلتنيش أختار , أنت كده أجبرتني هتقولي إذا كانت في مصلحة الدين فأنت ملكش رأي , أنا موافق ,, بس مين قال أن نعم هي مصلحة الدين ؟ مش الدستور والنظام اللي قلتوا عليه نعم ده اللي مكنش بيخلي حد يفكر مجرد التفكير أنه يصلي فرضين ورا بعض في نفس المسجد ؟ مش الدستور والنظام اللي قلتوا عليه نعم ده اللي خلى أهالينا يربونا أننا نبعد عن كل مسجد فيه ناس مربية دقنها ( ومش لازم الجوامع دي يبني ما كلها بيوت ربنا , صلي في أي جامع تاني أنا خايف عليك )

ياراجل دنا كنت بصلي الجمعة في مسجد من مساجد السلفين مرة وفارش في الشارع والبوكس واقف قدامي وظابط أمن الدولة قاعد على الكرسي وحاطط رجله في وشي وقاعد يشرب سجاير طول الصلاة وبعد الصلاة يلمله كام واحد ويمشي, إيه حلو في الدستور القديم خلاكوا تقولوا نعم ؟ استقرار ؟

نعم أو لا في كل الأحوال الاستقرار مش هيجي على طول , أقول ( نعم ) على دستور بيخلي الرئيس دكتاتور ؟ هو احنا كنا شيلنا دكتاتور علشان نجيب دكتاتور تاني؟ خايفين على المادة التانية من الدستور ؟؟؟ كلنا خايفين عليها ومحدش فينا هيقبل أن حد يقرب منها , بس هو مين جاب سيرتها أساساً ؟ مع إحترامي للأخوة المسيحين بس مفيش مسيحي قال ( نعم ) لتعديلات الدستور في الإستفتاء ومع ذلك النسبة طلعت 22 % ( لا ) دول شاملين المسلمين الي قالوا ( لا ) كمان اللي هو أنا منهم وناس كتير أعرفهم . يعني مفيش مقارنة في الأصوات أساساً لو حد فكر يقرب من المادة التانية , مش هي دي مبررات وُجوب قول - نعم

التعديلات ؟.أعتقد يا شيوخي الأعزاء أنه كان الأولى أنكوا كنتوا تدعوا في المساجد وفي الخطب أن ربنا يوفقنا للي فيه خير للبلد , مش تختاروا أنتوا الخير ده وتفرضوا الرأي الناس كلها وأنا أولهم كانوا متوقعين أن لو أغلبية نتيجة الإستفتاء طلعت لصالح ( نعم ) أول ناس هتفرح وتطلع هم الأخوان

المسلمين ,,أنا عن نفسي كنت متوقع أنهم هيقيموا الأفراح والليالي الملاح , الغريب بقى أن محدش سمع صوتهم فعلاً بعد النتيجة مع أني متأكد أنهم أكتر ناس فرحانة بالنتيجة دي.

أنا واحد من الناس مش مقتنع بالأخوان بتاتاً وشايفهم ناس هدفهم الأول سياسي لكنهم بيتخفوا وراء عباءة الدين , ودي مشكلة كبيرة لأن احنا عندنا حساسية ناحية كل ما يخص الدين, كل واحد عندنا بيتكلم بالدين بنخاف نعترض عليه أو نخالفه أحسن نأثم ونآخد ذنوب واحنا مش ناقصين. أنا واحد من الناس قلت ( لا للتعديلات الدستورية ) وربـنا يشهد أني مسلم , مُوحّــد , أشهد ألا إله إلا الله وأن محمداً رسول الله , ومش لابس في إيدي حظاظة الماسونية ولا على التي شيرت بتاعي الأسد الماسوني وخايف على ديني وعندي غيرة عليه زي أي مسلم وأكتر كمان ,وأنا فكرت كويس جداً قبل ماأروح وأقول ( لا ) وصليت إستخارة كمان قبل ما أروح , وأرفض رفضاً باتاً وأستنكر على أي حد أنه يوصفني بالمبتدع أو يحطني في قائمة أهل البدع زي ما قال الشيخ محمد حسين يعقوب ( وذكر قصة السلف الصالح لما كانوا بيقولوا لأهل البدع : بيننا وبينكم الجنائز , واحنا بنقولهم بيننا وبينكم (الصناديق ) أنا لست من أهل البدع , ولما الشيخ يطلع في خطبته يكبر تكبير العيد ومعتبره نصر على حد قوله , لو هو نصر فعلا والبلد بقت حلوه أنا هكون أول واحد فرحان ومبسوط لأني مليش أي مطالب ولا أي مصالح غير مصلحة البلد, وأرفض أن الشيخ محمد حسين يعقوب يتكلم عننا بضمير الغائب وكأننا أعداء ويقول بالحرف الواحد : ( اللي قالوا لأ , احنا مش زعلانين منهم , بس هم عرفوا مقامهم وعرفوا قدرهم وقدر الدين , واحنا اتحطينا معاهم في ميزان الدين وميزان الدين هو اللي عِـــلي ) أنا قلت -لا - وأنا مش من أعداء الدين وعمري ما هكون في كفة غير كفة الدين بإذن الله . ولما يتقال ( كل أهل الدين أجمعوا على - نعم - فبقى في ناحية دينية بتقول - نعم - وناحية تانية بتقول - لا - فأنت شكلك هيبقى وحش أوي لو قلت-لا-) أنا عمري ما هكون في اتجاه ديني لمجرد إني مكسوف أو خايف يبقى شكلي وحش , أنا لازم أقتنع الأول , وبعدين أنا لما قلت -لا- كنت شايف أن ده أفضل علشان ميجيش دكتاتور جديد يضيع ديني ودين اللي خلفوني ودين اللي هخلفهم كمان . يا شيخي العزيز أنت قلت :”إنك احيانا لما الشيخ يقولك اه قول اه حتى لو على خلاف هواك, ما بقولكش تابعني في الغلط لكن كن على ثقة إن في مسائل الدين أنني لن أختار لك إلا ما يرضي الله” تمام , بس أنا أحب أذكرك بقول الله تعالى : { قَالَ فِرْعَوْنُ مَا أُرِيكُمْ إِلا ما أَرَى* وَمَا أَهْدِيكُمْ إِلَّا سَبِيلَ الرَّشَادِ}غافر29

مش بشبهك بفرعون لا سمح الله بس أظن واضح أنا أقصد إيه.

ياشيخي العزيز ويا شيوخ السلفين , أنا أكتر حاجة بتحزنني فعلاً أن الناس كانت واخده عنكم فكرة وحشه وأنكم متشددين في الدين وأن الحياة معاكم صعبة وكلها تقشف , مع أن في كتير جداً منكم كويسين ومتسامحين ومش زي مالناس واخده فكرة عنكم , بس ليه بعد كل السنين دي كنتوا بعيد عن السياسة ؟ ولية دلوقتي قررتوا تدخلوا فيها ؟ كلكم بتقولوا أن ملكوش أي أهداف سياسية وأنكم مش هتترشحوا لأي منصب سياسي , طب ليه دخلتوا فيها بقى من الأول , وهتسيبوها بعد كده لمين ؟ محدش سمع أي كلام منكم أيام الثورة , مع أن أفضل الجهاد ( قول كلمة حق في وجه سلطان جائر ) محدش سمع صوتكم لما خالد سعيد إتقتل مع أن الأقباط طلعوا في مظاهرات علشانه قبل الملسمين , السيد بلال مكنش سلفي برضة ؟ ليه معترضتوش على قلتة ولا حد فيكم قال كلمة واحده حتى ؟ ليه مكنتوش بتعترضوا على غلق القنوات الإسلامية ؟ ليه مكنتوش بتعترضوا على الظلم اللي كان بيحصل ؟ ليه مكنتوش بتدخلوا غزاوت وكان يمكن تكسبوها بدل ما دلوقتي أعتبرتونا أعداءكم وبتحتفلوا بالنصر علينا ؟ ليه دلوقتي

( بس )

بدأتوا تتكلموا ؟ ليه فضلتوا ساكتين كل الزمن ده ولما إتكلمتوا خليتوا ناس كتير كانت بتحبكم تكرهكم وتبقى ضدكم ؟ والناس دي كويسة برضة على فكرة مش فـَـسقة وزناديق ودي ضريبة الجهاد والكلام ده ؟ الناس دي مسلمة زيها زيكم ومحدش يقدر يتكلم في دين حد ولا إسلامه ولا صلاح قلبه ولا علاقته برنا لأن دي حاجة بينه وبين اللي خلقه

أنا في مشاعر كتير جوايا متناقضة لكن الكلام عاجز عن التعبير عنها

وربنا يعــلم أنا بحترم أهل الدين وخصوصاً السلفين إزاي ( أنا ليا أصدقاء كتير جداً سلف وبحبهم وبحترمهم جداً على فكرة )يعلم الله أنا غيران على ديني ومضايق من اللي بيحصل ومن اللي بيتقال على أهل الدين اليومين دول إزاي.

لكن لا أنا ولا غيري من اللي قالوا ( لا ) أعداء الدين ولا أعداء أهل الدين , احنا مسلمين برضة يا جدعان والله ونفسنا البلد تبقى كويسة والفساد اللي فيها يختفي والتدين والتحضر يظهر على الناس ( مش في كلامها ولا في الخفاء ) يظهر في تصرفاتها وتعاملها مع بعض علشان البلد تبقى أحسن هو ده السبب الرئيسي اللي خلانا نقوم بالثورة .

.

أنا مــــحــتــار فعلاً

بقيت بسمع وبشوف كلام من ناس كنت بحترمهم جداً وبحبهم لكن كلامهم دلوقتي بقى مختلف جداً وبقى متناقض

هل أنتم فعلاً أولئك الشيوخ اللي كنا بنسمعها زمان وكنا بنتأثر بكلامها ؟

هل أنتم فعلاً أولئك الشيوخ اللي كان أغلبنا بيآخدهم قدوة ؟

هل أنتم فعلاً أولئك الشيوخ اللي الناس البسطاء كانوا بيخدوا كلامهم ثقة ومن غير تفكير ؟

ليه إستخدمتوا الثقة دي دلوقتي بالطريقة دي ؟

ليه طريقة الكلام دلوقتي بقت كده ؟

*******

ربنا يسامحنى لو كنت قلت كلمة غلط أو غلطت في حق حد بكلامي ده

*******

 ( سبحانك اللهم بحمدك , أشهدُ ألا إله إلا أنت , أستغفرك وأتوب إليك )

*******

بس أنا فـعلاً مـــحـــتـــــــــــار

أنا خايف على ديني وعلى نفسي وعلى بلدي

وبسأل

أنتوا إتغيرتوا فعلاً ولا لأ ؟ ولو إتغيرتوا إيه اللي غيركوا ؟

ولو متغيرتوش والكلام ده مش كلامكوا ليه محدش بيطلع يدافع عنكوا ؟

أنا حاسس أنكوا بقيتوا ناس تانين

إسمحولي أسألكوا سؤال مهم جداً الفترة دي

مــــــن أنــــتـــم !!!؟؟؟؟

  ملحوظة :
 حبيت أقول في النهاية أني ما حبتش في حياتي طائفة أو حزب أد السلفين , ومازلت ,, وليس معنى كلمي أني بقيت ضدهم , لأ , الكلام ده كان جوايا فكتبته , يمكن لحظة حماس أو سخونة حصلتلي أول ما شاهدت الفيديو , لكن ليس معنى كلامي أني بهاجمهم , هو مجرد نقد إن كان لي الحق في ذلك , وكل طائفة تشمل الحلو والوحش , مفيش مكان كله ملائكة ولا مكان كله شياطين,ويشّهَدُ الله أني أحبهم في الله.

 
 



أحمد الدسوقي

22/03/2011