أنا ليه بنادي عليكي وصوتي مش طالع
وليه بشكي هَـمّـي ومحدش في الدنيا سامع
أنا ليه حياتي واقفة عليكي وأنتي مش ليّـا
وليه حُـبِّـي ليكي بيزيد حتى في قسوتك عليّـا
أنا ليه كل ماتبعديني بقربلك
وكل ماتسيبيني برجعلك
أنا ليه مش قادر أحِـبّ غيرك
وليه كل ماتزيد قوتي ,, بضـعـفـلك
مليون واحد بيحاولوا يحطوا بيني وبينك ساتر
بيحاول يكتم نـَـفـَسي لكنـّه مش قادر
دا صوت قلبي أعلى من صوت الحناجر
يمكن أموت أنا النهاردة ,, ويمكن أموت باكـر
لو عندي مليون روح بيها هـفـديـكي
وعمري ماهكون في يوم لجميلك ناكـر
ولو رشقوا فيّـا مليون سهم
هفضل بروحي أنادي
ولآخر نقطة دم فيـّا
هفضل أقول , أنا ليكـي عاشق
يابلدي بحبك وحالف أصونك
ولو حصل إيه عمري فـ يوم ما أخونك
صاين عهدك يا بلدي لحد مَمَاتي
مستنيكي فـ يوم توفي بعهودك
حالف أصونك وأدافع عنـّـك
ولو يوم بكيتي همسحّ دَمْـعِـك
لكن أنتي اللي بتدوسي على وَلـدِك
وَلـدِك اللي ضحى بروحه لأجل إسمك
واللي كان كل همُّه , يشيل عنـِّـك همّـك
صابر عليكي ياحبيبتي وساكت
لكن كل صبر ولـُـه آخر
صبري طال يابلد وبدأت أمِـــلّ
شايل هَـمّـك على كتافي
وشارب المـُـرّ والــذلّ
كل يوم مرارك بيزيد
وكل يوم بيتقل الحِمّـل
شايله فوق ضلوعي بحلم في يوم ينزاح
إمتى هيجي اليوم يابلدي
ويتحقق الحِــلـــــــم
أحمد الدسوقي
19/11/2011
جميلة جدا يا احمد تسلم افكارك وقلمك
ردحذفجميلة اوي بجد .. ياما نفسي اعرف امتى هتسمع الام دي وتقوم بقى
ردحذفجميلة جدا .. وشير للغير ..
ردحذفانت مبدع يادوس _ بس لي بتهاجم مصر؟ مصر كويسه عشان كده تعبانااااااا
ردحذف