أنا فـ الميدان
جاي اطلب حقي
بالإعتصام
أهتف
أنادي
أدافع عن أخويا
عمري ماكنت فـ يوم جبان
سامع ضرب النار
حواليا فـ كل مكان
حاسب ياصاحبي
جَـيّ علينا خرطوش
متخفش يابن بلدي
احنا وحوش
ياما خدناه على صدورنا
ياما ضربونا فـ الوشوش
شايف عيني اللي راحت
شايف دمائنا اللي ساحت
دا كله علينا هيّـن
اللي تاعبني ومعذبني
أن الضربة جايه قوية
من أقرب الناس ليّـا
شوية ظباط فـ الداخلية
فاكرين أنهم ولاد البلد
وبيحموها
خايفين عليها
مني ومنك
ميعرفوش اني وأنك
بروحي وروحك
كده نحميها
أنا وطني عزيز عليّـا
ولو عندي بدل الروح 100
بيها هفديها
مش هآخد فـ التفكير ثانية
نفسي أشوف بلدي قوية
مش هي وبس
وكل البلاد العربية
مش من حقي أقول كلمة
في مظاهرة أطلعها سلمية
وكانت دي آخر جملة قالها
قبل متيجي رصاصة فـ قلبه
ويموت شهيد بين اديّــا
مالت راسه على صدري
والدم طرطش جه فـ وشـّـي
بصيت لقيته بـيـبـتسملي
صرخت ناديت إلحقوه
لكن محدش كان سامعني
مات والبسمة على شفايفه
كان كله أمل كنت شايفه
مات ومفيش غيري شايفه
ياخسارة شباب زي الورد
بيموت علشان محدش سامعه
ماشي لوحدي
مش عارف أوصف احساسي
مخنوق
مهموم
تعبان
قابلت واحد بره الميدان
ماشي كده تايه حيران
قاعد يقول أي كلام
ماشي يشتم فـ الثوار
سلفي كان أو اخوان
وقـفـته
وسألته
مالك ؟
قالي اوعى سيبني أنت كمان
أنت أكيد منهم
عايزين تخربوا البلد
هتـيَـتـّموا كل بنت وولد
بتهاجموا الشرطة اللي حاميانا
وبالهدوء والأمن مليانا
قلتله يبني محدش حاميك
ولا حامي بلدك
انت الوحيد
اللي هتقدر تحمي نفسك
قالي طب والداخلية ؟
قلتله الداخلية دي تبقى ملابسك
كفاية جهل وفوق من وهمك
قال بس بس , أنت عميل
قابض وشّ , ده أكيد
قلتله تآخد كام وتبقى زميل
قولي ضَــيّ عنيك يسوى كام
ولا روحك عندك بكام
كفاية بقى علينا هجوم
فوق بقى من وهمك فوق
قوم واتكلم كفاية سكوت
هتفضل كده ضعيف لإمتى
لحد مايجي يوم وتموت ؟
بتشتم فينا واحنا شايلينك على كتافنا
بنعدي بيك وبالبلد لبر الامان
عاجبك حالك
عاجبك بلدك
عاجبك مالك المنهوب
عاجبك عرضك المهتوك
فوق بقى يا أخي فووق
أرفع راسك وبص لفوق
بص وقولي شايف إيه
بص وقالي ياااه
دا حلم ده ولا كابوس
شايف وطني سِــيد العالم
شايف نفسي معايا فانوس
بدعك فيه يطلعلي المارد
شبيك لبيك أي فلوس
تطلب كام
معايا المال
قلتله عايز حرية
عايز كرامة وعيشة هنية
قالي مفيش حاجة معايا منها
أنا آخري أديلك مال
حريتك تجيبها بإيدك
بإيدك تقرر مصيرك
وبإيدك تغير الحال
عايز تعيش بكرامة
أو عايز تعيش متهان
وسكت ووقف سرحان
وفجأة لقيته بيهتف
وسابني وطلع يجري
ناحية المــــــــــــــــــــــيـدان
أحمد الدسوقي
25/11/2011
يا جنزبيـــــــــل يا جاامد
ردحذفحلوة أوي أوي بجد
بركات الميدان
^_*
انا بقى بحلم ان كل الناس تفهم الحقيقه دى يا احمد .. نفسى بجد الناس تفهم ان اللى نازل دا نازل يموت علشان هو يعيش وينعم بحياته ..ز نفسى مصر كلها تنزل الشارع وتقول كلمتها بصوت عالى
ردحذفتسلم دماغك يا شرير :))
بنت اجنده ;)
كلمات من القلب , أقرأها وكأنما أرى المشهد مصوّراً أمامي على شاشة واضحة الصوت والألوان , والجانب الأدبي فيها مبهر . أبدعت ماشاء الله عليك .
ردحذفبارك الله في قلمك ودماغك :)
حلاوة كلامك وقلبك يا مصري
ردحذف............حلو أوي
ردحذفرائعة يا احمد
ردحذفالداخلية دى تبقى ملابسك
ردحذفانت ياد كنت ساكت لية قبل كدة
gonzo