الناس مبقاش عندها أخلاق

من أعظم مفاسد نظام مبارك طوال الــ30عام الماضية ليست نهب الأموال ولا تفقير الشعب مادياً(أو بمعنى أدقّ)إفلاسه مادياً 
المَفسد العظيم الذي تركـه لنا نظام مبارك هو الإفلاس الأخلاقي.

احنا شعب فقير أخلاقياً،متزعلوش مني بس احنا فعلاً شعب فسدت أخلاقه

حتى في معاملاتنا،مبقاش حد طايق كلمة من حد 
الواحد بينزل من بيته مستني أي حد يكلمه علشان يوريله مهارات لسانه في اطلاق السباب بكل أنواعه
بقى من الطبيعي أنك تبقى ماشي في الشارع وودانك تلقط كل كلمة قبيحة وُجدت على كوكب الأرض.
بقى من الطبيعي أن البنت وهي نازلة من بيتها تبقى عارفة أنها هتسمع من الكلام ما يعجز إبليس عن قوله.
بقى من الطبيعي أن الناس كلها تبقى بتتفرج عليها وهي بتتعاكس ومحدش يتحرك من مكانه.

بقى من الطبيعي أنك متستحملش جارك لو بيجدد شقته وعاملك صداع طول اليوم.
بقى من الطبيعي متستحملش واحد سايق عربيته جنبك ولسه سواقته على أدّه(مع العلم أنك في يوم من الأيام كنت أنـيَـل منه في السواقة) .

الكلام اللي كنا بنسمعه زمان عن احترام الصغير للكبير وعطف الكبير على الصغير مبقاش موجود(دا الواحد مبقاش بيحترم أبوه دلوقتي هيحترم الناس اللي برة!!) .
وفي نفس الوقت بقى كل أب فاكر أن هو بس اللي عارف مصلحة ابنه، وعلى يقين تام أن ابنه من أول ما اتولد وهو بيحاول جاهداً أنه يفشل في حياته وأن وظيفة الأب انه يمنع ابنه من محاولاته دي،فبقى هو الوحيد القادر على تحديد مصيره الصحيح،يقوله يدخل كلية ايه وينام امتى ويصحى امتى ويشتغل ايه ويتجوز مين ويصاحب مين وميصاحبش مين،وكل شوية يفكره ببر الوالدين،مسمعش مرة عن بر الأبناء؟ميعرفش أن زي ما أنت ليك حق على ولادك ولادك هم كمان ليهم حق عليك!




مبقتش تفرق بين كبير وصغير
كام مرة شُفت شاب راكب عربيته وبيعدي من قدامه راجل  كبير في السن أو ست عجوزة والشاب مش قادر يصبر لحد ما يعدّوا بحركتهم البطيئة ونازل كلكسات وكلام ملوش لازمة وتريقة.
والراجل العجوز نفسه وهو معدّي تلاقيه بيشتم في الشاب ده وتسمع منه كلام عن قلة الذوق وعدم الإحترام وممكن يحاول يبطئ في مشيته لمجرد أنه يستفز الشاب.


اسأل نفسك امتى آخر مرة شفت شاب بيعدي راجل كبير  في السن الشارع؟
امتى آخر مرة شفت شاب بيساعد واحدة في سن والدته وهي شايلة حاجات ومش قادرة تمشي بيها في الشارع ؟ 
لو الإجابة كانت قريب يبقى أنت من الناس المحظوظة اللي اتكعبلت في الــ1 % النضيف من الشعب.


الرشوة بقت شئ طبيعي جداً بينا وبقت أقرب ما يكون أنها تبقى من ضمن رسوم تخليص أي أوراق أو مصالح
ومبقاش اسمها رشوة، بقى ليها 100 اسم تاني(قال يعني كده بقت حلال) .


الغش والكدب بقت من شئ اساسي في حياة كل واحد
التاجر عنده استعداد يحلف علشان يكسب في بضاعته نص جنيه
اللي بيكدب على مراته وبيخونها كل ساعة بيعتبروه فِـتْـك.
حتى الأذكياء مننا بقوا بيستغلوا ذكاءهم في النصب والسرقة.
لو أنت شايف أن كلامي ده غلط فدي تبقى مصيبة كبيرة لأن الحاجات دي بتحصل فعلاً كل يوم قدام عنيك،وكونك مبقتش بتلاحظها فده معناه انه وبقى شئ طبيعي بالنسبة ليك أنك تشوفها وبالتالي عمرك ما هتلاحظها وهتضايق لما تحصل.

بل بالعكس

لو أنت نازل من بيتك الصبح لقيت اتنين بيتخانقوا مع بعض(ممكن تكون على ركنة عربية،أو واحد خبط في كتف واحد وهو ماشي من غير ما يآخد باله)
وقاعدين يتخانقوا ويشتموا بعض بألفاظ سيئة جداً
لو كنت ماشي مع واحد صاحبك بتتكلم معاه ممكن متآخدش بالك من الخناقة دي أو ممكن تبص كده عليهم وهم بيتخانقوا وتسكت لحظة وبعدها تكمل كلام مع صاحبك.

طيب لو أنت نازل من البيت الصبح برضه وماشي بتتكلم مع صاحبك لقيت شاب بيعدّي راجل عجوز الشارع،أو شاب بيعاكس بنت فشاب تاني راح اتخانق معاه 
لو لقيت شاب نازل من عربيته وماسك كيس في إيده ومشى بيه لحد أي صندوق زبالة ورمى الكيس في الصندوق ورجع ركب عربيته ومشي تاني،
هل هتعدي أي موقف من المواقف اللي فاتت من غير ما تعلق عليها ولو بكلمة لصاحبك؟ 
الواد ده جدع  أوي 
الواد ده محترم جداً
وهيبقى كلامك فيه نبرة استعجاب وإعجاب
صح؟!!
بقينا بنستغرب لو شفنا المواقف دي قدامنا ومبقاش يلفت نظرنا مشهد الخناقة لأنه بقى بيحصل قدامنا كل يوم


مع أن المفروض العكس اللي يحصل

هي دي مصيبتنا
العادات والقيم الحميدة بقينا بنستغرب لو حصلت قدامنا والعادات السيئة اعتدناها لدرجة اننا مبقناش بنآخد بالنا منها.

قليل جداً اللي بقى بيراعي ربنا في شغله وبيته وزوجته وأولاده.


احنا معشناش 30 سنة فقر وجوع بس
احنا متسرقتش مننا فلوسنا ولا صحتنا بس
احنا اتسرق مننا أهم حاجة فينا
أخلاقنا وشهامتنا وجدعنتنا وكل حاجة حلوة فينا


الجوع والفقر والغلاء وكترة الإحتياجات خلت المواطن مخنوق وملوش نفس يضحك

الراجل يتخانق في البيت وينزل يبقى مش طايق  حد ولا طايق نفسه ومستني أي كلمة من حد علشان يطلّع خنقته فيه.
كل واحد بقى عايش حاسس أنه مظلوم ومتعلّم عليه من الرؤوس الكبيرة
فمش هيخلي الرؤوس الصغيرة هي كمان تعلّم عليه
(هو ميعرفش أن الرؤوس الصغيرة دي أغلب منه وعندها برضه من الهم زي اللي عنده ويمكن أكتر) 


الناس دي خلتنا نكره بعض
وصلتنا لدرجة خلت كل واحد يفكر أن التاني عالة عليه
بيآكل أكله وبيلبس لبسه،حتى لو مكنش حد بيطلب منه حاجة.
كنت قاعد في يوم من الأيام مع واحد في الخمسينات من عمره والكلام تطرق لموضوع مرسي وشفيق وأن شفيق لو مسك البلد هتولع والمظاهرات هتقوم تاني،الراجل قال بالحرف الواحد كده: يلا،أحسن خلي البلد تولع يمكن يموتلنا مليون واحد ولا حاجة والبلد تروق شوية
قلتله : أنت بتقول إيه يا عم أنت ؟!! حرام عليك،وبعدين احنا داخلين على الـ 90 مليون،المليون ده هو اللي هيحسن دخلك ويفرق معاك؟! قالي: آه والله يا دكتور،يسلام لو يموت من مصر10مليون واحد مثلاً  ونبقى 80 مليون،البلد تروق كده والحال يتعدل شوية،دا سنة ونص أهو وثورة قامت وممتش مننا غير يجي 750 واحد بس  
(محدش يشتم الراجل ده ولا يلومه،لوموا اللي وصّـلُه للحالة دي والدرجة دي من انحطاط التفكير)




تيجي تقول لحد الكلام ده يقولك آه والله عندك حق(الناس مبقاش عندها أخلاق )
وتيجي تتفرج عليه وعلى أخلاقه تشوف العجب


مش هو لوحده
كلنا
كل واحد فينا شايف غيره معندوش أخلاق ولو حَسّـن أخلاقه شوية البلد هيتصلح حالها،كل واحد عايز التاني يحسن أخلاقه ومحدش بيفكر يبدأ بنفسه


أنت نَـفسك وأنت بتقرأ الكلام ده 
هتقول نفس الكلمة
الناس مبقاش عندها أخلاق 


الناس دي لو كانت خدت فلوسنا بس كنا ممكن نآخدها منهم تاني ونسامحهم


لكن الناس دي خدت مننا حاجة متتقدرش بتمن


أخلاقنا وقيمنا وكل حاجة حلوة فينا

أحمد الدسوقي

20/6/2012