في جُملة كان قالها المُخرج الشاب عمرو سلامة قبل كده
كانت بتقول:
" مرة بعد مباراة الأهلي والزمالك ولما فاز الأهلي ( كالعادة ) جماهير الزمالك كانت هتموت بحسرتها ، في الليلة دي قابلت لعيبة الزمالك وكانوا بيضحكوا ويهزروا ومحدش فيهم زعلان،
من يومها وأنا بطلت آخد أي حاجة على صدري "
مش عارف افتكرت الكلام ده وأنا شايف المشهدين النهادرة
واحد في التحرير وواحد في مدينة نصر قدام المنصّة
ياترى فين شفيق ومرسي دلوقتي ؟
ياترى كل واحد فيهم مرعوب وخايف وزعلان ومهموم أنه ممكن يخسر وميقدرش يخدم بلده ولا عاملين زي لعيبة الزمالك بعد الماتش ؟
ممكن نقول الأخوان خايفين شفيق يكسب علشان ميرجعهومش السجون تاني - والحمدلله الأخوان الفترة اللي فاتت سابوا ذكرى زي الهباب عند الناس لدرجة أن لو شفيق كسب ورماهم في السجون الناس هتفرح فيهم ومحدش هيدافع عنهم.
وممكن نقول شفيق خايف الأخوان يكسبوا علشان هو من مصلحته أن النظام القديم يرجع أو أي سبب آخر ولو الأخوان كسبوا ممكن يحاكموه هو كمان وتبقى أيامه أسود من لون الجزمة اللي اتحدف بيها.
بس خلينا متأكدين أن كل واحد من الطرفين مأمّن نفسه كويس جداً في حالة خسارته
وفي كل الأحوال المجلس العسكري كل ما البلد تبوظ والحال يتدهور بيبقى الموضوع في مصلحته
أهو على الأقل هيلاقي مبررات لوجوده وهيمنته على الحُكم لحد دلوقتي
الشعب هو الوحيد اللي متضرر في كل الأحوال
انقسام وتشتت وصراعات
أنا شفت بعين واحدة بتقول ( لأخوها ) : أنا عمري ما هسامحك لو الأخوان مسكوا البلد
مع انه مش أخوان ، بس لمجرد أنه انتخب محمد مرسي في الإعادة
اللي في التحرير واللي عند المنصّة الأتنين بيحبوا البلد ونفسهم بلدهم تبقى أحسن بلد ( مش كلهم يعني )
لكن كل واحد بيفكر بطريقة مختلفة وليه وجهة نظر مختلفة
بغض النظر عن بعض المخربين وأصحاب المطامع الشخصية سواء هنا أو هنا
المشكلة أن الناس بقت بتُوَجـّـه بطريقة غريبة جداً
كل تجمع من الأتنين دول بيخـَـوّن التاني وشايفه بلطجي ومش عايز مصلحة البلد
وعنده استعداد يشتبك معاه ويفرمه وممكن يموت في سبيل أنه يموت الناس دي
وهيعتبر نفسه شهيد لأنه كان بيدافع عن وطنه ضد الخونة والعُملاء والمأجورين
عارف أن مش كل اللي في التحرير معتصمين تحسباً لنتيجة الانتخابات
جزء كبير منهم معتصم رفضاً للإعلان الدستوري المُكمل اللي المجلس العسكري اتحفنا بيه من كام يوم
بس خلينا واقعين ونعترف أن اللي مدي هيبة للميدان والعدد دا كله هم الأخوان،
السؤال اللي بيطرح نفسه دلوقتي
لو النتيجة طلعت ومرسي كسب ،، هل الأخوان هيفضلوا معتصمين في الميدان لحد مالإعلان الدستوري المكمل ده يسقط ولا هيقولوا خلاص كده احنا انتصرنا وهنشوف موضوع الإعلان الدستوري ده متقلقوش ؟
!!!
هسيبلك الإجابة
وفي نفس الوقت مش فاهم اللي معتصمين قدام المنصة دول عايزين ايه ؟
مليونية ايه دي يعني؟
إيه المطالب؟
معترضين على اعتصام التحرير ؟
يعني أنا اعترض على اعتصام بإعتصام ؟
دا بأي منطق؟
وبرضه جزء منهم واخد مقابل علشان يعمل حاجة هو مش مقتنع بيها
وجزء كبير تاني بيدفع فلوسه علشان يهمه أن البلد تفضل خربانة أو النظام القديم يرجع تاني علشان مصالحه ترجع تمشي تاني.
لسه من ساعات قليلة جدا صديق ليا على فيس بوك مسحني من عنده بعد ما شتمني طبعا،
ومسحني لأني دافعت عن الناس اللي في التحرير بعد ما وصفهم بأنهم هم لقطاء مصر وتقمص دور القذافي وقعد يقول : من أنتم يا خرفان ، لو كنتوا نزلتوا مليون فعند المنصة 2 مليون يا بهايم وتحية إلى المعتصمين عند المنصة.
( دا كلامه )
الراجل ده بيحب مصر ، المفروض يعني
وعلى حد كلامه هو كان من الناس اللي نزلت التحرير في يناير 2011
بس شوفوا وصلنا لفين ؟
المجلس العسكري مجلس معلمين بحق وحقيقي
بيلعب لعبتين معانا من أول الثورة وبيلعبهم صح جداً
وغباءنا بيساعدهم لأننا مبنتعلمش أبداً
أول لعبة : فرق تسد
وهو ده حالنا دلوقتي
تاني لعبة: لو حصلت مصيبة أو عملت حاجة والشعب بدأ يعملك دوشة عليها اخترعله أي حاجة تانية تشغله
اشغله عن أي مصيبة بمصيبة تانية يفكر فيها وينسى المصيبة الأولى ،
ولما ينسى الأولى ويبدأ يتكلم عن التانية هاتله واحدة تالتة تشغله عن التانية ،
وهكذا.
خُــلاصة الكلام لأني مش عارف أنا بكتب الكلام ده ليه ، أنا قلت أفضفض وخلاص
المفروض أن النتيجة النهائية النهاردة
الأحد 24/06/2012
دا لو متأجلتش كمان كام اسبوع كده
النهاردة هيبقى يوم فاصل،
ممكن يكون يوم أبيض في تاريخ مصر والثورة والشعب
وممكن يكون يوم ربنا وحده اللي يعلم بيه
( ولا أقصد النتيجة ، بل أقصد ما بعد النتيجة )
مش هقول أني متفائل ولا متشائم ،، لأني مبقتش حاسس بحاجة
بس ياريت نفكر شوية ونتفق مرة على حاجة كلنا وكل واحد يجنّــب مصالحه الشخصية بعيد شوية ونقف ضد كل واحد مش عايز البلد دي تقوم تاني،
وصدقوني
لو البلد دي حالها بقى أحسن كلنا هنستفيد
لكن بالطريقة دي
كمان كام سنة
هنبقى ذكري شعب
أحمد الدسوقي
24/6/2012
والله معاك حق
ردحذفالمشكله ان الانقسام بيحصل بين الشعب وبعضه
والمرشحين ممكن اللى خسر فيهم هيزعل شويه
بس بعدين هيمشى اموره بردو
مش معنى ان محمد مرسى كسب يبقى شفيق هيستخبى
لا هيزعل يمكن انه مش كسب زى ما بيتمنى
بس بعد كده هيفوق ويشوف ممكن يعمل ايه عشان يعدى الموقف ده
لكن اللى بيفضل الاختلافات ما بين الناس
كل واحد واخد اتجاه معاكس للتانى
لا وكمان بيتكلموا بقله فهم وتقدير للرأى الاخر
و الله أنا مع إني مش مصرية بس بقيت حاسة بإحباط زي مااكون معاكو بالضبط
ردحذفالمجلس العسكري عرف يفرق بين الناس بشكل رهيب و صراحة الاخوان بغبائهم غلطو كتير و اهو دلوقت مرسي كسب ، أتمنى بقى اللي جاي يبقى أحلى فعلا و ينفذو كل وعودهم
بجد نفسي الثورة تنجح ، و لو إني عارفة إن الحجات دي مش بالدعاء بس عشان مش في إيدي حاجة تانية فأنا قاعدة و بدعي
سلامي