رسالة إلى الوالـــي

قبل أي كلمة ، تحية لكل واحد بذل نقطة عرق في سبيل وطنه ، تحية عميقة جداً - لن توفي حق - لكل من بذل نقطة دم في سبيل وطنه.
لن أخفي فرحتي اليوم ( بسقوط شفيق وليس نجاح مرسي )
ولن أخفي خوفي وعدم اتفاقي مع الأخوان،
ناس كتير جداً حالهم كحالي، مش مقتنع بالأخوان ، لكن كـُرهي لشفيق وخوفي من عودة النظام القديم طغى على عدم اقتناعي بالأخوان.
مش هنكر أني زعلت جداً الفترة اللي فاتت لأن مرسي جه وقت وبقى بيمثل تيار الثورة والثورين والمدافع عن الثورة ، زعلت لأن جه وقت وهو كان رمز الثورة ، هتنتخب الثورة ( محمد مرسي ) ولا النظام القديم ( أحمد شفيق ) ؟
مش هنكر أن فرحتي بسقوط شفيق أفسدتها نجاح مرسي ( أو بمعنى أدق تَخَوفي من مستقبل البلد مع مرسي )
لكن برغم كل ده ...
عمري ما هنسى مُعدل ضربات قلبي اللي اضطرب رُعباً أول ما حسيت في لحظة من سياق الكلام - اثناء الخطاب الطويل المُمل بتاع لجنة الانتخابات - أن شفيق هو اللي كسب ،
عمري ما هنسى القشعريرة المصحوبة بالفرحة اللي حسيت بيها أول ما أعلنوا فوز الدكتور محمد مرسي.
مع أني كنت متصور اني هتقبل النتيجة ببرود جداً كعادتي.

ننسى بقى كل الكلام اللي فات ده
خلاص كده ، كفاية ...
محدش يتكلم عن موقف الاخوان من الثورة قبل 25 يناير ،
محدش يتكلم عن موقف قيادات الاخوان أثناء الثورة،
محدش يتكلم عن مواقفهم في مجلس الشعب،
محدش يقعد يجيب كلامهم وفيديوهات ليهم قبل كده ويقعد يشكك فيهم،
انسوا الانتخابات محدش يتكلم فيها،
محدش يسأل التاني أنت انتخبت مين أيام الانتخابات ولا انت كنت عايز مين يكسب،ولو مكنش انتخب شفيق يخونه ويقوله يا فلول،
خلاص الانتخابات خلصت وفي مُـرشح كسب ، نقف جنبه لحد ما  تبان لينا نواياه،
صفحة جديدة اتفتحت في تاريخ مصر،
لازم كلنا نقف جنب بعض وجنب رئيسنا الجديد لحد مالبلد ترجع تقف تاني ( قال يعني كانت واقفة أولاني - عـَـدّوهالي دي )

مش هتكلم عن الخطاب بتاع محمد مرسي النهاردة لأن الكلام سهل ،المهم الفعل ، لكن نتوسم في الراجل خير لأن المنصب ده مسئولية كبيرة مش أي حد بيكون أدها.

لأول مرة منذ بداية الثورة هنحاول نتفائل.

كلمة بس أحب أوجهها للأخوان عامة :
" ياريت بس متنسوش الناس اللي تعبت ونزلت من بيوتها وكافحت واتنبح صوتها واتسحلت واتعرت واتكسر عضمها علشان انتوا تخرجوا من سجونكوا وتوصلوا للنقطة اللي احنا فيها دلوقتي ،، النقطة اللي كانت بالنسبة ليكوا من سنتين بالظبط حلم تخافوا تحلموه أحسن أمن الدولة يطبّــوا عليكوا يخدوكوا من سرايركوا وانتوا نايمين ،، متنسوش أن الناس دي هي اللي نجّحتكوا في الإعادة ، كتلتكوا التصويتية كأخوان لوحدها عمرها ما كانت تنجح محمد مرسي ،، متنسوش الناس دي لأن الناس دي ليها فضل كبير عليكوا بعد ربنا ، بس كده "

وبالنسبة للدكتور محمد مرسي أحب أقوله :
" اتق الله فينا وانت هتلاقينا جنبك وبنساندك على طول ،، الغير اخواني قبل الأخواني ،، أنا متوسم فيك خير إن شاء الله، عايزك رئيس يتقي ربنا فينا ، يعمل بالقرآن اللي هو حافظه ،، وطول منتا بتصلح البلد وبتنصر المظلوم على الظالم احنا معاك ،، هتحاول تضيع حقنا وتعمل زي اللي قبلك أكيد مش هتكون أغلى عندنا من اللي قعد معانا 30 سنة وكان عِـشرة وكان بينا طوابير عيش وأنابيب وقطورات وعبارات وأمراض وأوبئة ، ومهما  بلغ جبروتك وانتشرت أنت وحزبك وتوغلت داخل البلد عمرك ما هتوصل لجزء بسيط من توغل وجبروت النظام السابق الموجود على مدة 30 عام والذي خلعناه في 18 يوم - هذا ليس تهديد ولكنه للتذكرة - "

ياريت كل الشعب بقى يقف جنب بعضه لمرة واحدة في حياته ويبقى إيد في إيد ويساند رئيسه حتى لو هو شايفه مش مناسب، هو خلاص بقى أمر واقع مفروض عليك حتى لو أنت مش متقبله،
أقف جنبه لحد ما تلاقي منه التصرفات اللي تجبرك تبعد عنه،
متبعدش أنت عنه من أولها كده ،، اديله فرصة ، على الأقل علشان يبقى عندك مبررات وهو ميبقاش عنده حجة.
أكيد كلنا نفسنا بلدنا تبقى أحسن بلد ولما اخترنا مُرشح معين اخترناه لأننا كنا نتوسم فيه أنه يقدر يقوم بالمهمة دي ، فكل اللي يهمنا مصلحة البلد أياً كان الرئيس الموجود ،  نقف جنبه علشان مُرادنا كلنا يتحقق.
ياريت منستعجلش عليه وعلى تقييم أداءه لأن كلنا متفقين أن البلد فعلاً خربانة وحالها صعب جداً ومحتاج وقت علشان يتصلح،
ياريت محدش يقعد يشكك فيه من أولها ويمسكله على الواحدة ويطلعله في واجبات المفروض يعملها ، والمفروض الرئيس أول قرار يطلعه يبقى كذا وكذا ، هو معملش ده ليه ؟ فين يا عم الناس اللي في السجون ؟ فين ياعم المعتقلين ؟ فين حق الشهدا ؟ فين المحاكمات ؟ فين وفين وفين ؟!
كل ده لازم يحصل وواجب عليه أنه يعمله ، بس بلاش نقف ليه على الواحدة ونستعجل عليه ، زي ما قلت ،، نديله فرصة ، أكيد مش هيخرب البلد لأن البلد خلاص خربانة ومفيهاش حاجة تانية تتخرب.
واحنا إيد في إيد لحد ما نرفع بلدنا إن شاء الله
ونسيبنا بقى من التعصب ده ونفكر شوية في مستقبل البلد،.


ملحوظة : موقف يُحسب لأحمد شفيق النهاردة 
في مداخلة هاتفية مع عماد أديب على قناة الـسي بي سي
الراجل اتكلم بكل أدب وبارك لمحمد مرسي ولم يشكك في لجنة الانتخابات العليا أو يقول كلمة سيئة ،، مهما اختلفنا معاه هذه نقطة تُـحسب له .

    ندعوا الله بالخير لمصر وللمصريين ولكل الدول العربية والإسلامية

أحمد الدسوقي

24/6/2012